काठमाडौं (हाम्रो खेलकुद) – नेपाल पुलिस क्लब र टाइम्स इन्टरनेसनल कलेज होम एण्ड अवे लिगको आधारमा राजधानीमा जारी क्वीक्स नेपाल बास्केटल लिगमा सहज जित निकालेका छन् ।

मंगलबार भएको खेलमा विभागीय नेपाल पुलिस क्लबले दि रोयल बास्केटबल क्लबलाई १०९–६८ को अन्तरमा पराजित गर्दै सहज जित निकालेको हो ।

पहिलो क्वाटरमा पुलिसले २४–१५ को अग्रता बनाएको थियो । दोस्रो क्वाटरमा २७–२० को अग्रता लिएको पुलिस तेस्रो क्वाटरमा २६–२८ ले पछि परेको थियो । तर, चौथो क्वाटरमा पुलिसले ३२–५ को आरादायी अग्रता लिएपछि सहज जित निकाल्न सफल भयो ।

सर्वाधिक २१ स्कोर गरेका पुलिसका साहनुर रहमान खेलको म्यान अफ दि म्याच घोषित भए । उनले १ ब्लक, ४ असिस्ट र १४ रिवाउन्ड गरे ।

मंगलबारै भएको अर्काे खेलमा टाइम्स इन्टरनेसनल कलेजले बिएमसी साउथ साइडर्सलाई ७७–६५ को अन्तरमा हरायो ।

पहिलो क्वाटरमा २०–१८ को अग्रता बनाएको टाइम्स दोस्रो क्वाटरमा ७–२० ले पछि परेपनि तेस्रो र चौथो क्वाटरमा पुनरागमन गर्दै ३०–१७ र २०–१० को अग्रता बनाउदै जित निकाल्न सफल भयो । म्यान अफ दि म्याच बनेका टाइम्सका मविन्दै क्षेत्रीले २१ स्कोर गरे ।

टाइम्स ७ खेलबाट १४ अंक जोडेर लिगको शीर्ष स्थानमा रहेको छ । आर्मी १३ अंक जोडेर दोस्रो स्थानमा रहेको छ । पुलिस ९ अंकसहित तेस्रो र ९ अंक नै जोडेको गोल्डेनगेट चौथो स्थानमा रहेको छ ।

समान ८ अंक भएपनि बिएमसी साउथ साइडर्स र बुढानिलकण्ठ पाँचौ र छैटौ स्थानमा तथा समान ७ अंक जोडेको कीर्तिपुर र दि रोयल बास्केटल सातौ र आठौं स्थानमा रहेको छ । दि रोयलले ५ तथा कीर्तिपुरले ६ खेल खेलेको छ ।

लिगअन्तर्गत बुधबार कुनै खेल हुने छैन । बिहीबार आर्मी र बुढानिलकन्ठ तथा टाइम्स र गोल्डेनगेट कलेजबीच खेल हनेछ ।