काठमाडौं (हाम्रो खेलकुद) –आउदो मङ्सिरमा नेपालमा आयोजना हुने १३औं दक्षिण एसियाली खेलकुद (साग) मा नेपालबाट ६ सय २५ जना खेलाडीले प्रतिस्पर्धा गर्ने भएका छन् ।

युवा तथा खेलकुद मन्त्रालयमा बिहीबार बसेको १३औं सागको मुल आयोजक समितिको बैठकले मंसिर १५ देखि २४ गते सम्मका लागि तय भएको १३ औं सागमा नेपालका ६ सय २५ खेलाडीले प्रतिस्पर्धा गर्ने राष्ट्रिय खेलकुद परिषद (राखेप)का उपाध्यक्ष पिताम्बर तिम्सिनाले हाम्रो खेलकुदलाई जानकारी दिए ।

तिम्सिनाका अनुसार बैठकमा ८ एजेन्डामा छलफल भएको थियो । पहिलो एजेन्डामा लोगो र मस्कटको विषयमा छलफल भई टुंगो लागेको छ । दोस्रो एजेन्डामा सागमा सहभागी हुने राष्ट्रलाई परराष्ट्र मन्त्रालयबाट सम्बन्धित राजदुतावसाबाट निमन्त्रणा गरिने निर्णय भएको छ ।

१३औं सागमा सहभागी हुने खेलाडीलाई जेठ पहिलो साताबाट बन्द प्रशिक्षणमा राखिने बैठकले निर्णय गरेको छ । यस्तै १३औं सागका लागि आवश्यक खेल सामग्री व्यवस्थापन गर्न अर्थ मन्त्रालयमार्फत मित्र राष्ट्रमार्फत आह्वान गरिने बैठकले निर्णय गरेको छ ।

यस्तै बैठकले उपाध्यक्ष तिम्सिनाकै संयोजकत्वमा १३औं सागको बजेट बनाउने कार्यदल निर्माण गरिएको छ । जसमा सदस्यसचिव केशव कुमार विष्ट, महालेखा, खेलकुद मन्त्रालय र अर्थ मन्त्रालयको सहसचिवलाई राखेर कार्यदल बनाइएको छ ।

१३औं सागको विभिन्न उपसमितिका लागि गंगा थापाको संयोजकत्वमा प्राविधिक उपसमिति बनाइएको छ । जसमा रिम रानाभाट, पार्थ सराथी सेन गुप्ता र निलेन्द्रराज श्रेष्ठ सदस्य छन् । यस्तै बैठकले १३औं साग सञ्चालनको कार्यविधि पारित गरि क्याविनेट पठाउने निर्णय गरेको छ ।