काठमाडौं (हाम्रो खेलकुद) – नेपाली ब्याडमिन्टनका युवा स्टार प्रिन्स दाहालले थाइल्यान्डको बैंककमा जारी योनेक्स सिंगा–रोजा बिटिवाई इन्टरनेशनल च्याम्पियनसिप–२०१९ को ब्वाइज यु–१७ मा पदक पक्का गरेका छन् ।

प्रिन्सले यु–१७ तर्फ शनिबार बिहान भएको क्वाटरफाइनलमा तेस्रो वरीयता प्राप्त थाइल्यान्डका नाथाप्पे श्रीयानलकलाई २–० को सोझो सेटमा पराजित गर्दै सेमिफाइनलमा स्थान पक्का गरेसँगै पदक पक्का गरेको उनका प्रशिक्षक तथा व्यवस्थापक कमलेस निरौलाले हाम्रो खेलकुदलाई जानकारी गराए ।

उनले थाइल्यान्डका नाथाप्पे श्रीयानलकलाई २१–१३ र २१–१६ को सोझो सेटमा हरायो ।
योनेक्स सिंगा–रोजा बिटिवाई इन्टरनेशनल च्याम्पियनसिप–२०१९ मा यु–१९, यु–१७, यु–१५, यु–१३, यु–११, मिक्स डबल्स् र डबल्स्मा २२ राष्ट्रका करिव १ हजार ९ सय खेलाडीको सहभागिता रहेको छ । यु–१७ मा २५६ खेलाडीले प्रतिस्पर्धा गरेका थिए ।

प्रिन्स छनोट चरणदेखि नै जित निकाल्दै अन्तिम चारमा पुग्न सफल भएका हुन् । अब उनले सेमिफाइनलमा आजै भारतका विकास यादवसँग प्रतिस्पर्धा गर्ने प्रशिक्षक निरौलाले जानकारी गराए ।

प्रिन्सले यसअघि दुवई इन्टरनेशनलमा पनि ब्वाइज यु–१७ मा उपाधि जितेका थिए । यसै साता दाङमा सम्पन्न आठौं अन्र्तगतको ४०औं राष्ट्रिय ब्याडमिन्टन च्याम्पियनसिपको पुरुष टिम इभेन्टको एकल खेलमा नेपालका शीर्ष वरीयताका रत्नजित तामाङलाई पराजित गर्दै सनसनी मच्चाएका थिए ।