दाङ (हाम्रो खेलकुद) आठौं अन्तर्गत पुरुष एकल कतामा नेपाल पुलिस क्लबका मन्डेकाजी श्रेष्ठले स्वर्ण जितेका छन् ।

स्वर्ण जित्ने क्रममा मन्डेले फाइनलमा प्रदेश ७ का ललित खत्रीलाई ५–० ले हराए । त्यसअघि मन्डेले आर्मीका पर्शुराम बास्तोलालाई ३–२ ले पराजित गर्दै फाइनलमा स्थान बनाएका थिए । एपीएफका अनिल चौधरीले कास्य जिते ।

स्वर्ण जितेपछि मन्डेले अहिलेसम्मकै ठुलो सफलता हात पारेको बताए । ‘स्वर्ण जितमा खुशीको सीमा नै छैन । म मात्र हैन मेरो गुरुहरु पनि उत्तिकै खुशी छन् । यो सबै मिहेनतको फल हो । स्वर्णले अझै राम्रो गर्न हौसला मिलेको छ,’ मन्डेले स्वर्ण जितेपछि भने, ‘स्वर्णको खुशी मेरा प्रशिक्षक र परिवालाई दिन चहान्छु ।’

यस्तै उनी करातेको तीन विधा फाइट (कुमुते), टिम काता र व्यक्तिगत कातामा स्वर्ण जित्ने खेलाडी बनेका छन् । मन्डेले पाँचौ राष्ट्रिय खेलकुदमा ५० केजी तौल समुहमा स्वर्ण जितेका थिए । छैटौमा टिम कातामा स्वर्ण जित्न सफल मन्डेले आठौंमा एकल कातामा स्वर्ण जित्न सफल भएका हुन् ।

महिला एकल कातामा पुलिसकी चञ्चला दनुवारले स्वर्ण जितिन् । एनआरएनएकी सुभद्रा श्रेष्ठले रजत जितिन् । एपीएफकी प्रतीक्षा पाख्रिन र आर्मीकी संगिता मगरले कास्य जितिन् ।

टिम काता पुरुषमा आर्मी स्वर्ण जित्न सफल भयो । नेपाल पुलिसले रजत तथा प्रदेश ७ र प्रदेश ६ ले संयुक्त रुपमा कास्य जिते । महिला टिम कातामा पुलिस स्वर्ण जित्न सफल भयो । आर्मीले रजतमा चित्त बुझाउँदा प्रदेश १ र गण्डकी प्रदेशले कास्य पाए ।

करातेको पहिलो दिन चार विधा सकिदा ३ स्वर्ण र एक रजतसहित पुलिस शीर्ष स्थानमा रहेको छ । आर्मी एक स्वर्ण, एक रजत र एक कास्यसहित दोस्रो स्थानमा रहेको छ । प्रदेश ७ समान एक र रजत र एक कास्यसहित तेस्रो, एनआरएनए एक रजतसहित चौथो स्थानमा रहेको छ । दुई कास्यसहित एपीएफ पाँचौ, गण्डकी, प्रदेश १ र प्रदेश ६ समान एक कास्यसहित छैटौ, सातौ र आठौं स्थानमा रहेको छ ।