काठमाडौं (हाम्रो खेलकुद) – राष्ट्रिय गोजुरियो कराँते दो संघ नेपाल, सुदूरपश्चिम प्रदेशको आयोजनामा आगामी जेठ दोस्रो साता क्षेत्रीय रंगशाला धनगढीमा नवौं अन्तर्राष्ट्रिय गोजुरियो कराँते प्रतियोगिता हुने भएको छ ।

जेठ ९ देखि ११ गतेसम्म हुने प्रतियोगितामा नेपालसहित दक्षिण एसियाका भारत, पाकिस्तान, बंगलादेश, श्रीलंका र भुटानका झण्डै १ हजार खेलाडीहरुले सहभागिता जनाउँने आयोजक राष्ट्रिय गोजुरियो कराँते डो संघले सोमबार पत्रकार सम्मेलनमार्फत जानकारी गरायो ।

प्रतियोगितामा काता, कुमुते र टिम कुमिते गरी तीन विधामा प्रतिस्पर्धा हुनेछ । प्रतियोगिता संयोजक तथा संघका केन्द्रीय महासचिव प्रकाश चन्दका अनुसार तीनवटै स्पर्धामा ४० स्वर्ण, ४० रजत र ८० कास्यका लागि प्रतिस्पर्धा हुनेछ । प्रतियोगिताको कुल ४१ लाख ९१ हजार रुपैया रहेको छ ।

खुल्ला प्रतियोगिता भएकाले नेपालबाट सातवटै प्रदेश, स्कुल, कलेज, डोजो तथा विभागीय खेलाडीहरुले प्रतियोगितामा सहभागिता जनाउँने संघले जनाएको छ ।

कार्यक्रममा नेपाल कराँते महासंघका महासचिव हरिशरण केसीले सा–सानो सहयोगले प्रतियोगिता सफल हुने भन्दै व्यक्तिगत रुपमा आ–आफ्नो तर्फबाट मेडल तथा अवार्डका लागि भन्दै १५ हजार नगद सहयोग गरेका थिए ।

प्रतियोगितालाई अघिल्लो संस्करण झै यस संस्करणमा पनि राष्ट्रवादी विकासशील अभियान नेपाल रहेको छ। अभियान र संघकाबीच सोमबार सम्झौता पत्रमा हस्ताक्षर समेत भयो ।

सम्झौता पत्रमा विकासशील अभियानका अध्यक्ष कमलबहादुर श्रेष्ठ र संघका केन्द्रीय अध्यक्ष गणेश कार्कीले हस्ताक्षर गरेका थिए । सम्झौता अनुसार विकासशीलले नगद ८ लाखसहित प्रतियोगितालाई अन्य भौतिक सहयोग प्रदान गर्नेछ ।