काठमाडौं (हाम्रो खेलकुद) – विभागीय नेपाल एपीएफ क्लब र होङग्वान्जी न्यु डायमन्ड एकेडेमी छैठौं सशस्त्र प्रहरी महानिरीक्षक राष्ट्रिय खुुल्ला महिला भलिबल प्रतियोगिताको समूह विजेता बन्दै सेमिफाइनलमा प्रवेश गरेको छ ।

हल्चोकस्थित एपीएफ क्लबको भलिबल कोर्टमा बुधबार भएको समुह चरणको अन्तिम खेलमा उपाधिको दावेदार एपीएफले ढोरपाटन स्पोर्टस् क्लबलाई ३–० को सोझो सेटमा पराजित गर्दै समूह ‘ए’ को विजेता बनेको हो ।

एकपक्षीय खेलमा एपीएफले ढोरपाटनमाथि २५–१, २५–१० र २५–२ को सहज जित निकाल्यो । यो समूहबाट त्रिभुवन आर्मी क्लब उपविजेताको रुपमा सेमिफाइनलमा पुग्न सफल भयो ।

बुधबारै भएको अर्काे खेलमा होङग्वान्जी न्यु डायमन्ड एकेडेमीले जावलाखेल भलिबल प्रशिक्षण केन्द्रलाई २५–१०, २५–५ र २५–७ को सोझो सेटमा पराजित गर्दै समूह ‘बी’ को विजेता बन्दै सेमिफाइनलमा प्रवेश गर्न सफल हुदा पुलिस उपविजेताको रुपमा अघि बढ्यो ।

अब बिहीबार एपीएफ र पुलिसबीच पहिलो सेमिफाइनल तथा न्यु डायमन्ड र आर्मीबीच दोस्रो सेमिफाइनल खेल हुनेछ ।

पाँचौ संस्करण सकिदा एपीएफ तीनपटक च्याम्पियन हो । चौथो संस्करणमा एपीएफलाई पराजित गर्दै न्यु डायमन्ड चयाम्पियन बनेको थियो । सबै संस्करणमा एपीएफ र न्यु डायमन्डबीच नै फाइनल खेल भएको छ ।