काठमाडौं (हाम्रो खेलकुद) – नेपाली महिला टेबल टेनिसकी पुर्व नेपाल च्याम्पियन्स रीता मुखर्जी शाहले बुधबार खेल जीवनबाट सन्यास घोषणा गरेकी छिन् ।

पुर्व च्याम्पियन ७४ वर्षीय रीताले राजधानीमा बुधबार पत्रकार सम्मेलनको आयोजना गर्दै सन्यासको घोषणा गरेकी हुन् ।

‘मेरो खेल जीवनलाई सफल बनाउन सहयोग गर्ने परिवार, खेलाडी र प्रशिक्षक सबैमा आभार व्यक्त गर्न चाहन्छु,’ सन्यास घोषणा गर्दै शाहले भनिन्, आजकै दिनबाट मैले खेल जीवनबाट सन्यास घोषणा गर्दछु । टेबल टेनिस खेलको निरन्तर विकासको कामना गर्दछु ।’

१५ बर्षकै उमेरमा शाह महिलातर्फ नेपाल च्याम्पियन बनेकी थिइन् । उनी लगातार पाँच वर्ष नेपाल च्याम्पियन बन्न सफल भएकी थिइन् । शाह वि.स. २०१५ देखि २०२० सम्म लगातार पाँच बर्ष नेपाल च्याम्पियन बनेकी थिईन् ।

उनी टेवल टेनिसबाट विदेशमा प्रतियोगिता खेल्न जाने पहिलो नेपाली महिला खेलाडी तथा १५ वर्षकै उमेमा ओलम्पिक खेल्ने महिला खेलाडी समेत बनिन् । रीताले चीनको बेइजिङमा भएको विश्व टेबल टेनिस च्याम्पियनसिपमा नेपालबाट प्रतिस्पर्धा गरेकी थिईन् । त्यसपछि भने उनले पारवारिक व्यस्तताका कारण केही वर्ष खेल त्यागेपनि पछि खेलको मायाले भेट्रान्सतर्फ खेल्न थालेको बताइन् ।

नेपाल राष्ट्र बैंकमा जागिरे भएपछि उनले अन्तर संस्थान भेट्रान्स टेवल टेनिसमा लगातार २० वर्ष च्याम्पयन बन्न सफल भएकी थिइन् । शाहले दुई बर्षअघि भारतको गोवामा सम्पन्न अन्तर्राष्ट्रिय भेट्रान च्याम्पियनसिपमा प्रतिस्पर्धा गरेकी थिईन् ।

उनले खेलको शुरुवात गर्दा अन्तर्राष्ट्रिय खेलबाटै गरेको र सन्यास लिदा पनि अन्तर्राष्ट्रिय प्रतियोगिता हुनु संयोग रहेको बताइन् ।