काठमाडौं (हाम्रो खेलकुद) – हिमालयन ह्वाइट हाउस इन्टरनेशनल कलेजको आयोजनामा सोमबारदेखि प्रथम ह्वाइट हाउस इन्टर कलेज (अण्डर १८) बास्केटबल प्रतियोगिता हुने भएको छ ।

कुल ८ टिमको सहभागिता रहेको लिग कम नकआउट प्रतियोगितामा राजधानीका ८ कलेजहरुको सहभागिता रहनेछ । प्रतियोगितामा ९ कक्षा देखि प्लस टुसम्म अध्ययनरत १८ बर्ष भन्दा मुनिका खेलाडीहरुको मात्र सहभागिता रहनेछ ।

प्रतियोगिताको समुह ‘क’ मा आयोजक ह्वाइट हाउस, ज्ञान निकेतन, इन्साइट भिजन र ट्रिनिटी इन्टरनेशनल कलेज रहेका छन् । अर्को समुहमा टाइम्स इन्टरनेशनल कलेज, गोल्डेन गेट, ट्रिटन र जेभियर इन्टरनेशनल कलेज रहेका छन् । लिग चरणमा पहिलो दुई स्थान हात पार्ने टिमहरु सेमिफाइनलमा प्रवेश गर्नेछन् ।

प्रतियोगिताका सबै खेलहरु ह्वाइट हाउस वल्र्ड स्कुल कोटेश्वरको बास्केटबल कोर्टमा हुनेछन् । ह्वाइट हाउसले प्रतियोगितामार्फत सुस्ताइरहेको कलेज बास्केटबललाई पुर्नजीवित गर्ने बिश्वास लिएको छ ।

ह्वाइट हाउसका सिइओ युवराज शर्माले पहिले धेरै भन्दा धेरै कलेज लेभलका बास्केटबलहरु भएपनि पछिल्लो समय सस्त भैरहेको अवस्थामा यो प्रतियोगितामार्फत त्यो समयलाई फर्काउन चाहेको बताए ।