काठमाडौं (हाम्रो खेलकुद) – तेस्रो संस्करणको झिल्टुङ क्रस कन्ट्री रेस च्याम्पियनसिप चैत पहिलो साता नुवाकोटमा आयोजना हुने भएको छ ।

आयोजक बेलकोटगढी नगरपालिका वडा नम्वर ५ ले राजधानीमा पत्रकार सम्मेलनको आयोजना गर्दै तेस्रो संस्करणको च्याम्पियनसिप यही चैत २ गते गराउने जानकारी गराएको हो ।

लियो क्लब अफ नुवाकोट र श्री महादेव स्कुलको संयुक्त आयोजनामा हुन लागेको रेसको संयोजक पूर्व धावक तथा प्रतियोगिता संयोजक मोहन नेपालले जानकारी गराए ।

‘जे गरौं गज्जबले गरौं’ भन्ने नाराका साथ हुन लागेको उक्त रेसमा १३.४ किलोमिटरको महिलार पुरुष दौड र ४.५ किलोमिटरको रन फर फन रेस हुनेछ ।

नुवाकोटस्थित कोल्पुटारबाट सुरु हुने रेस कोल्फुटार, बेलिनि, राजोदार, माझगाउँ, लामाचौर हुँदै कोल्पुरटारमा पुगेर सकिनेछ ।

मुख्य विधा १३.४ को महिला र पुरुष विजेताले समान २५ हजार, दोस्रो हुनेले १५ तथा तेस्रो हुनेले १० हजार नगद पाउँनेछन् । यस्तै कोर्स रेकर्ड बनाउनेले थप ५–५ हजार प्राप्त गर्नेछन् ।
४.५ किलोमिटरको छात्र र छात्रा विजेताले समान ५ हजार, दोस्रोले ३ हजार र तेस्रो हुनेले २ हजार रुपैया हात पार्नेछन् ।

च्याम्पियनसिपको पहिलो संस्करणमा पुरुषतर्फ होमलाल श्रेष्ठ र महिलातर्फ सन्तोषी श्रेष्ठ च्याम्पियन भएका थिए । दोस्रो संस्करणमा पुरुषतर्फ भुमिराज राई र महिलामा कान्छीमाया कोजु कोजु च्याम्पियन बनेकी थिइन् ।