पोखरा (हाम्रो खेलकुद) – ठमेल युनाइटेडले भेट्रान्स बास्केटबल प्रतियोगितामा ह्याट्रिक उपाधि जित्न सफल भएको छ ।

कास्की जिल्ला बास्केटबल संघको आयोजना तथा पोखरा महानगर पालिकाद्वारा संरक्षित ‘तेश्रो कुँवर व्रर्दश एण्ड शन्स् राष्ट्रिय भेट्रान्स बास्केटबल प्रतियोगितामा आयोजक कास्की जिल्ला बास्केटबल संघलाई ६४–४८ को स्कोरले पराजित गर्दै उपाधिमा ह्याट्रिक गरेको हो । ठमेल युनाइटेड यसअघिका दुवै संस्करणमा च्याम्पियन बन्न सफल भएको थियो ।

उपाधिसँगै ठमेल यूनाइटेडले नगद ५५ हजार ५ सय ५५ रूपैया हात पा¥यो । उपविजेतामा चित्त बुझाएको कास्की जिल्ला बास्केटबल संघले नगद ३३ हजार ३ सय ३३ रूपैया हात पा¥यो । प्रतियोगितामा कास्कीका खेलाडी रबिन साही उत्कृष्ट खेलाडी घोषित भए । ठमेल युनाइटेडका कर्मा गुरुङले सर्वाधिक स्कोरर घोषित हुँदै विशेष ट्रफी प्राप्त गरे ।

नेपाल प्रहरी प्रधान कार्यालय नक्सालका एसएसपी नरोत्तमलाल प्रधान, नेपाल बास्केटबल संघका उपाध्यक्ष जुम प्रसाद गुरुङ, क्षेत्रिय भलिबल संघका संस्थापक अध्यक्ष श्रीभक्त गुरुङ, जिल्ला प्रहरी कार्यालय कास्कीका डिएसपी गोबिन्द पुरी, सोसल पव्लिकका संस्थापक खिम गुरुङ लगाएतले बिजेता टिम तथा खेलाडीलाई ट्रफी, मेडल तथा प्रमाणपत्र वितरण गरे ।

समापन कार्यक्रममा नेपाल बास्केटबल संघका पूर्व उपाध्यक्ष एवम् नेपाल सेभेन ‘ए’ साइडका अध्यक्ष नविन पुनलाई सम्मान गरिएको थियो ।

४० वर्ष देखि माथी उमेर समुहका खेलाडीको रहेको उक्त प्रतियोगितामा ६ टिमको सहभागिता रहेको थियो । काठमाडौको ठमेल युनाइटेड, तनहु जिल्ला बास्केटबल संघ, एक्स अम्बर सिंहको ‘ए’ र ‘बी’, लामाचौर भेट्रान्स तथा आयोजक कास्की जिल्ला बास्केटबल संघको टिमले प्रतियोगितामा प्रतिष्पर्धा गरेका थिए । प्रतियोगिता गत फागुन २ गते बाट संचालन भएको थियो ।