काठमाडौं (हाम्रो खेलकुद) – नेपाली फुटसल टोलीले फुटसल विश्व च्याम्पियनसिप खेल्ने भएको छ । नेपाल फुटसल संघले सोमबार राजधानीमा पत्रकार सम्मेलनको आयोजना गर्दै नेपाली टोलीले अर्जेन्टिनामा आउदो मार्च ३१ बाट अगस्ट ७ सम्म हुने विश्व च्याम्पियनसिपमा सहभागिता जानउने जानकारी गराएको हो ।

१२औं संस्करणको विश्व च्याम्पियनसिपका लागि नेपाले एसिया महादेशबाट वाइल्ड कार्ड इन्ट्रीबाट छनोट हुन सफल भएको संघका उपाध्यक्ष सन्तोष पराजुलीले जानकारी गराए । च्याम्पियनसिपमा नेपालसहित विश्वका १६ राष्ट्रले सहभागिता जनाउदैछन् ।

विश्वका महारथी खेलाडीहरुसँग खेल्न पाउनु नेपाली खेलाडीको लागि म्याच एक्सपोजर हुने संघका उपाध्यक्ष सन्तोषले बताए । च्याम्पियनसिपमा नेपालसहित अर्जेन्टिना, अष्ट्रेलिया, क्यानडा, क्षटालोनिया, फ्रान्स, इटाली, पाराग्वे, रसिया, दक्षिण अफ्रिका, उरुग्वे, पाकिस्तान र कोलम्वियाले प्रतिस्पर्धा गर्नेछन् । तीन टोलीको भने टुंगो लाग्न बाँकी छ ।

यही प्रतियोगिताको लागि टिम छनोटका लागि आगमी शुक्रबार राष्ट्रिय खेलकुद परिषदस्थित राखेपको कभर्डहलमा खुला छनोट प्रतियोगिता आयोजना गरिएको संघले जनाएको छ । १२ सदस्यी टोली यसअघि नै रहेपनि पुन खुल्ला छनोट गरिन लागेको संघले जनाएको छ ।

नेपाल फुटसल संघ २०१६ मा स्थापना भएको हो । स्थापना पश्चात नै नेपालले श्रीलंकामा भएको तेस्रो साफ फुटसल च्याम्पियनसिपमा सहभागिता जनाउदै दोस्रो स्थान हात पारेको थियो । त्यस्तै नेपालले २०१८ मा पाकिस्तानमा ब्राजिल, टर्की, पाकिस्तान र नेपाल सम्मिलित प्रतियोगितामा तेस्रो स्थान हात पारेको थियो । यही प्रतियोगिताबाट नेपालले एसोसिएसन मुन्डियल डि फुटसल (एएमएफ) को पूर्ण सदस्यता प्राप्त गर्न सफल भएको थियो । एएमएफ विश्वका फुटसल हेर्ने संस्था हो

गत डिसेम्वरमा पाकिस्तानमै त्रिकोणीय सिरिज खेलेको थियो । जसमा नेपालले दोस्रो स्थान हात पारेको थियो । संघले निकट भविष्यमै राष्ट्रिय च्याम्पियनसिप र राष्ट्रिय लिग गर्ने समेत घोषणा गरेको छ ।