काठमाडौं (हाम्रो खेलकुद) – नेपाली राष्ट्रिय हक्की टिमका चार सदस्य प्रशिक्षणका लागि पाकिस्तान जाने भएका छन् ।

नेपाल हक्की संघले बिहीबार राजधानीमा पत्रकार सम्मेलनको आयोजना गर्दै चार खेलाडी पाकिस्तानी हिरोज क्लबमा अनुबन्ध भएको जानकारी गराएको छ । चार खेलाडीमा रोमन राना, सागर आचार्य, राजेन्द्र कार्की र मनोज चौधरी रहेका छन् । उनीहरुले पाकिस्तानी क्लबमा प्रशिक्षणका साथै प्रतियोगताहरुमा सहभागिता जनाउनेछन् ।

उनीहरूले यसअघि एफआइएच वल्ड ओपन सिरिजमा सहभागिता जनाएका थिए ।
यस्तै संघले माघ अन्तिम साता झापाको भद्रपुरमा गिरिजाप्रसाद कोइराला मेमोरियल राष्ट्रिय पुरूष हक्की प्रतियोगिता आयोजना गराउने जानकारी गराएको छ । प्रतियोगिता माघ २६ बाट ४ फागुनसम्म आयोजन हुदैछ । प्रतियोगितामा तीन विभागीय टोली (आर्मी, पुलिस, एपीएफ) र सात विभागीय टोलीको सहभागिता रहनेछ ।

लगत्तै फागुनमा विराटनगरमा गिरिजाप्रसाद कोइराला मेमोरियल राष्ट्रिय महिला हक्की प्रतियोगिता हुने संघले जानकारी गराएको छ ।

पुरूषतर्फको प्रतियोगिताको अनुमानित रकम २५ लाख र महिलातर्फ २० लाख खर्च हुने आयोजकले अनुमान गरेको छ ।

यसअघि नेपाली महिला टोलीले पाकिस्तानमा डिसेम्वर १७ देखि २३ सम्म भएको हेयर हक्की सिरिज खेलेको थियो । यही सिरिज पश्चात नेपाल ८८ औं वरीयतामा आउन सफल भएको थियो ।
संघले यसअघि गत साता मात्रै साहना प्रधान मेमोरियल राष्ट्रिय महिला हक्की प्रतियोगिता आयोजना गरेको थियो ।