काठमाडौं (हाम्रो खेलकुद) – नेपाल नम्वर वान नविता श्रेष्ठ र स्यान्टु श्रेष्ठ टेवल टेनिस खेलको सामग्री उत्पादन गर्ने भारतको चर्चित कम्पनी स्ट्याग इन्टरनेसनलको ब्रान्ड एम्वासडर बनेको छ ।

स्ट्यागले नेपालमा पहिलोपटक दुई खेलाडीलाई २ वर्षको लागि ब्रान्ड एम्वासडरमा नियुक्त गरेको हो । दुई वर्षे सम्झौतापत्रमा दुवै खेलाडीले हस्ताक्षर गरिसकेको नेपाल टेबल टेनिस संघले मंगलबार पत्रककार सम्मेलनको आयोजना गर्दै जनाकारी गरायो । सम्झौता प्रति खेलाडी वार्षिक २ देखि ३ लाख रुपैया हुन आउने संघले जनाएको छ ।

नेपाली टेबल टेनिस खेलको इतिहासमा कुनै बहुर्राष्ट्रिय कम्पनीले खेलाडीलाई आफ्नो सद्भावना दूत बनाएको यो पहिलो अवसर हो ।

अखिल नेपाल टेबल टेनिस संघका अध्यक्ष चतुरानन्द वैद्यले सद्भावना दूत बन्न सफल दुवै खेलाडीलाई बधाई दिँदै यसले अन्य खेलाडीलाई पनि प्रेरणा मिल्ने विश्वास व्यक्त गरे । उनले खेलाडीकै पहलमा यो कार्य सम्भव भएको र यो पैसा भन्दा पनि ड्रेस कोडको लागि रहेको थपे । यस्तै अध्यक्ष वैद्यले स्टयाग इन्टरनेसललाई टेबल टेनिसको विकासमा पुर्याएको सहयोगका लागि धन्यवाद दिए ।

यस्तै ब्रान्ड एम्वासडर बनेकी नेपाल नम्वर वान महिला खेलाडी नविता श्रेष्ठले स्ट्याग जस्तो कम्पनीको ब्रान्ड एम्वासडर बन्न पाउनु आफ्नो लागि खुशीको कुरा रहेको र यसले आगमी दिनमा राम्रो प्रदर्शन गर्न प्रेरणा मिलने बताइन् । उनले एसियन गेम्स दौरानको अभ्यासका क्रममा भारतमा रहँदानै ब्रान्ड एम्वासडरको लागि पहल भएको बताइन् ।

यस्तै पुरुष तर्फको नम्वर वान स्यान्टु श्रेष्ठले पहिलोपटक स्पोन्सर पाएकोमा खुशी व्यक्त गर्दै अब कुनै पनि प्रतियोगिता खेल्न जादा ड्रेस कोडमा समस्या नहुने बताए ।