काठमाडौं (हाम्रो खेलकुद) – ‘बी’ डिभिजन क्लब बाँसबारी युवा क्लबले मुख्य प्रायोजकको रुपमा स्पार्क हेल्थ होम अस्पताललको साथ पाएको छ ।

‘बी’ डिभिजन लिग खेल्ने तयारीमा रहेको बाँसबारीले मंगलबार स्पार्क हेल्थ होम अस्पतालसँग् एक वर्षको लागि मुख्य प्रायोजनमा सम्झौता हस्ताक्षर गरेको हो । सम्झौतामा बाँसबारी क्लबका अध्यक्ष प्रेम थापा र स्पार्क अस्पतालका निर्देशक रुपेश अधिकारीले हस्ताक्षर गर्दै सम्झौता पत्र आदान–प्रदान गरे । सम्झौतापछि स्पार्क अस्पतालले बाँसबारी क्लबलाई नगद र खेल सामग्रीमा गरी कुल ८ लाख उपलब्ध गराउनेछ । यस्तै खेलाडीको उपचारमा पनि सहुलियत हुनेछ ।

क्लबका अध्यक्ष प्रेम थापाले स्पार्कसँगको सम्झौता पछि क्लबलाई लिग खेल्न राहात मिल्ने बताए । उनले स्थानिय खेलाडीलाई प्राथमिकतामा राख्दै लिगको तयारी गरिरहेको बताए । उनले लिगमा करिव २२ लाखको बजेट तयार पारिएको बताए ।

यस्तै स्पार्कका निर्देशक रुपेश अधिकारीले इतिहास बोकेको क्लब ऐतिहासिक बाँसबारी क्लबसँग जोडिन पाउनु खुशी र गर्वको खुशी रहेको बताए । ‘ए’ डिभिजन लिगका क्लबलाई प्रायोजन गर्ने तयारी भएपनि बजेट अभावका कारण गर्न नसकिएको र थोरै बजेटमा बाँसबारी क्लबलाई प्रायोजन गरिएको बताए ।

अखिल नेपाल फुटबल संघका अध्यक्ष कर्मा छिरिङ शेर्पाले ‘बी’ डिभिजन लिग क्लब बाँसबारीले स्पार्कसँग सम्झौता गर्दै व्यवसायिक कार्यको थालनी गरेकोमा खुशी व्यक्र गरे ।