काठमाडौं (हाम्रो खेलकुद) – तेस्रो संस्करणको गणेशमान स्मृति बक्सिङ प्रतियोगितालाई विभिन्न पाँच कर्पोरेट हाउसले प्रायोजन गरेका छन् ।

आयोजक गणेशमान सिंह फाउन्डेसनले आइतबार विभिन्न पाँच कर्पाेरेट हाउस जगदम्बा मोटर्स, लियोन मोटर्स, लवेल्स (रिवोक), व्रिज सिमेन्ट र लक्ष्मी बैंकसँग प्रायोजन सम्झौता हस्ताक्ष गरेको हो ।

सम्झौतामा टिभिएसको आधिकारिक विक्रेता जगदम्बा मोटर्सका मार्केटिङ हेड विक्रम शर्मा पौडेल र प्रतियोगिता संयोजक राजीव श्रेष्ठले हस्ताक्षर गरे । यस्तै लियोन मोटर्सका सेल्स एण्ड मार्केटिङ निवा सिंहले लवेल्स (रिवोक) का सन्जीव तुलाधरले, व्रिज सिमेन्टका अमित श्रेष्ठ र लक्ष्मी बैंककी रणनीतिक मार्केटिङ प्रमुख भारती पाण्डेले सम्झौतामा हस्ताक्षर गरे ।

सम्झौताअनुसार जगदम्वा मोटर्सले ६ लाख रुपैया बराबरको समान १–१ थान मोटर साइकल र स्कुटर प्रदन गर्नेछ । लियोनले ५ लाख उपलब्ध गराउनेछ । रिवोकले नगद र खेल सामग्रीमा गरी कुल ५ लाख प्रदान गर्नेछ । ब्रिज सिमेन्ट र लक्ष्मी बैंकले समान ३–३ लाख रुपैया उपलब्ध गराउनेछ ।

राष्ट्रिय खेलकुद परिषद राखेपको सहयोग र नेपाल बक्सिङ संघको प्राविधिक सहयोगमा हुन लागेको प्रतियोगितामा तीन विभागीय टोली र ७ प्रदेश गरी कुल १० टोलीको सहभागिता रहनेछ । प्रतियोगितामा पुरुषतर्फ ८ र महिलातर्फ ६ तौल समुहमा प्रतिस्पर्धा हुनेछ । प्रतियोगिताका लागि आयोजकले यसअघि सातै प्रदेशमा छनोट आयोजना गरेको थियो ।

पुरुषतर्फ ४६–४९, ५२, ५६, ५०, ६४, ६९, ७५ र ८१ केजी तौल समूहमा प्रतिस्पर्धा हुनेछ । महिलातर्फ ४५–४८, ५१, ५४, ५७, ६० र ६४ केजी तौल समूहमा प्रतिस्पर्धा हुनेछ । पुरुषमा ८० र महिलामा ६० खेलाडी गरी १ सय ४० खेलाडीको सहभागिता रहनेछ ।

हरेक तौल समूहको पुरुष र महिलाको विजेताले २५ हजार, दोस्रो हुनेले १५ हजार र सेमिफाइनलमा पुग्नेले समान ७ हजार ५ सय रुपैया प्राप्त गर्नेछन् ।

यस्तै प्रतियोगिताको सर्वाेत्कृष्ट हुने पुरुष खेलाडीले एक स्थान मोटर साइकल र महिलातर्फको सर्वाेत्कृष्टले एक थान स्कुटी हात हात पार्नेछ ।

प्रतियोगिता राजधानीको बसन्तपुर डबलीमा माघ २२ र २३ गते हुनेछ । गणेशमान स्मृतिको नाममा यसअघिको दुई संस्करण योङ स्टार क्लबले आयोजना गरेको थियो ।