काठमाडौं (हाम्रो खेलकुद)- विभागीय टोली त्रिभुवन आर्मी क्लब र पश्चिमाञ्चल क्षेत्रीय खेलकुद बिकास समिति पोखराले राजधानीमा जारी १४औं रेडबुल ढोरपाटन सुजुकी महिला डबल लिग भलिबल प्रतियोगितामा शनिबार सफलता हात पारेका छन् ।

नयाँ बसपार्कस्थित ढोरपाटन क्लबको खेल मैदानमा शनिबार भएको खेलमा आर्मीले चितवन टाईगर्सलाई ३–० को सोझो सेटमा पराजित गरेको हो । एकपक्षीय खेलमा आमीले पहिलो सेट २५–२१ ले सहजै आफ्नो पक्षमा पारेको थियो । दोस्रो सेट २५–१८ ले सहजै जितेको आर्मीले तेस्रो सेट २५–१३ ले जित्न सफल भयो ।

जितसँगै आर्मीले शीर्षस्थानमा रहेको साविकको विजेता नेपाल एपीएफ क्लब र नेपाल पुलिस क्लबसँगको अंक बराबरी गरेको छ । एक खेल बढी खेलेको आर्मीको ६ खेलबाट १५ अंक पुगेको छ । लिगमा अपराजित रहेको एपीएफ र पुलिसको समान ५ खेलबाट १५ अंक रहेको छ ।

शनिबारै भएको अर्काे खेलमा पश्चिमाञ्चल क्षेत्रीय खेलकुद बिकास समिति पोखराले आयोजक ढोरपाटन क्लबलाई ३–० को सोझो सेटमा पराजत गर्दै लिगमा तेस्रो जित दर्ता गर्न सफल भयो । पश्चिमाञ्चलले ढोरपाटनलाई २५–१०, २५–११ र २५–९ को सोझो सेटमा हरायो ।

यस जितसँगै पश्चिमाञ्चल ४ खेलबाट १० अंक जोडेर लिगको पाँचौ स्थानमा उक्लिएको छ । ढोरपाटनले भने लिगमा अहिलेसम्म जित निकाल्न सकेको छैन । सामाखुशी इंग्लिस बोर्डिङ स्कुल ११ अंक जोडेर चौथो स्थानमा रहेको छ ।

प्रतियोगिता अन्तरगत आइतबार लिगका चार खेल हुने आयोजकले जनाएको छ । नेपाल पुलिस र पश्चिमाञ्चलबीच पहिलो खेल हुनेछ । दोस्रो खेलमा चितवन टाइगर्स र ढोरपाटन, तेस्रो खेलमा एपीएफ र आर्मी तथा अन्तिम खेलमा पुलिस र चितवन टाइगर्सबीच खेल हुनेछ ।

९ टोलीको सहभागिता रहेको प्रतियोगिताको दोस्रो चरणमा ७ टोलीले स्थान बनाउनेछन् । यि टोलीहरुबाट धेरै अंक हात पार्ने टोली लिगको च्याम्पियन बन्नेछ । प्रतियोगिताको विजेताले ३ लाख ५० हजार पाउनेछ दोस्रो हुने टोलीले दुई लाख प्राप्त गर्ने छ । त्यस्तै तेस्रो हुनेले १ लाख, चौथो हुने टोलीले ६० हजार, पाँचौ हुनेले ४० हजार, छैठौं हुनेले ३० हजार र सातौं हुने टोलीले २० हजार नगद पुरस्कार प्राप्त गर्नेछन् ।

व्यक्तिगत विधातर्फ उत्कृष्ट खेलाडी, उदयमान खेलाडी, बर्ष खेलाडी, प्लेयर अफ दि सिरिज र एक जना भाग्यमानि दर्शकले १–१ थान सुजुकी स्कुटर पाउनेछन् । त्यस्तै उत्कृष्ट स्पाइकर, उत्कृष्ट डिफेन्डर, उत्कृष्ट ब्लकर, उत्कृष्ट सर्भर, उत्कृष्ट सेटर र उत्कृष्ट प्रशिक्षकले समान ६–६ हजार नगत प्राप्त गर्नेछन् । प्रतियोगिता ५ माघबाट २० माघसम्म चल्नेछ ।