काठमाडौं (हाम्रो खेलकुद) – नेपाल एपीएफ क्लबकी सरस्वती चौधरी र त्रिभुवन आर्मी क्लबका धनबहादुर भट्ट एनभीए अवार्ड वर्ष २०७५ का उत्कृष्ट महिला तथा पुरुष खेलाडी घोषित भएका छन् । नेपाल भलिबल संघ (एनभीए) ले वर्षेनी प्रदान गर्दै आएको अवार्डसँगै दुवै खेलाडीले जनही २५-२५ हजार रुपैया प्राप्त गरे ।

उदयीमान खेलाडीतर्फ महिलामा आर्मीको निरुता ठगुन्ना र एपीएफका विनोदबहादुर चन्द उत्कृष्ट घोषित भए । उनीहरुले पनि समान २५-२५ हजार पाए ।

नेपाली राष्ट्रिय भलिबल टोलीका पूर्वकप्तान भरत बहादुर शाहलाई दुई दशक भलिबलमा अनवरत खेलेर योगदान दिएकोमा नगद रु २५ हजारसहित अभिनन्दन गरियो ।
पुर्व कप्तान भरत शाहले विगतभन्दा अहिले धेरै परिवर्तन आएको बताए । ‘ मलाई सम्मानित गरेकोमा संघलाई धन्यवाद प्रकट गर्न चाहन्छु । विगत र अहिलेको अवस्था बेग्लै छ । भौतिक पूर्वाधारको कमीले विकासक्रम रोकिएको छ । त्यसमा सम्बन्धित सबै पक्षले ध्यान पुर्याउनु जरुरि छ,’ उनले भने । शाहले २०४५ देखि २०६६ सम्म खेलेका थिए ।

यस्तै नेपाली महिला भलिबल टोलीकी पहिलो कप्तान अन्जु श्रेष्ठलाई पनि अभिनन्दन गरियो । अन्जु आठौ र १० औ सागमा राष्ट्रका लागि दुई कास्य जिताउन सफल कप्तान हुन् । अन्जुले यस्तो खालको सम्मानले भविष्यका पिढीलाई खेलकुदमा लागन प्रोत्साहन मिल्ने बताइन् ।

उत्कृष्ट प्रशिक्षकमा महिलातर्फ एपीएफका ज्ञानेन्द्र विष्ट तथा पुरुष तर्फ आर्मीका कपिलकिशाेर श्रेष्ठ सम्मानित भए । उनीहरुले पनि समान २५-२५ हजार पाए ।

उत्कृष्ट टोली बन्दै महिलातर्फ एपीएफ र पुरुषतर्फ आर्मी सम्मानित भए । उत्कृष्ट टोली बनेको आर्मी र एपीएफले १-१ लाख रुपैया पाए । कान्तिपुर टेलिभिजनका प्रदिप कुमार लेखी पनि सञ्चारकर्मी पुरस्कारस्वरुप २५ हजारले सम्मानित भए ।