टोरिनो (एजेन्सी) – इटालियन सिरी ‘ए’ फुटबलमा आज राति शीर्ष स्थानमा रहेको युभेन्टसले साम्पडोरियासँग प्रतिस्पर्धा गर्दैछ । खेल नेपाली समयअनुसार युभेन्टसको मैदान एलिआन्ज स्टेडियममा साँझ ५ः१५ बजेपछि हुनेछ ।

सिरी ‘ए’ मा अपराजित रहेको युभेन्टस साम्पडोरियालाई पराजित गर्दै आफ्नो अपराजित यात्रालाई अझै लम्ब्याउने लक्ष्यमा हुनेछ । युभेन्टसले साम्पडोरियाविरुकद्धको पछिल्ला १० खेलमध्ये ८ खेलमा जित हात पारेको छ । समान १ बराबरी र १ हार रहेको छ ।
युभेन्टसले साम्पडोरियालाई पराजित गर्न सके सिरी ‘ए’ मा नयाँ कीर्तिमान बनाउनेछ । सिरी ‘ए’ मा सन् २००५–६ र २०१३–१४ को सिजनमा आफैले राखेको कीर्तिमानलाई भंग गर्नेछ । युभेन्टसले त्यतिबेला १९ खेलबाट ५२ अंक जोडेर नयाँ कीर्तिमान बनाएको थियो ।

युभेन्टसलाई यसै सिजन स्पेनिस क्लब रियल मड्रिडबाट युभेन्टस पुगेका पोर्चुगलका सुपरस्टार क्रिस्टियानो रोनाल्डोको साथ रहनेछ ।
उनकै गोल मद्दतमा युभेन्टसले गत बुधबार एटलान्टासँगको समभावित हार टारेका थिए । खेल २–२ गोलको बराबरीमा पुगेको थियो । रोनाल्डोले युभेन्टसका लागि १२ गोल गरिसकेका छन् । यस्तै युभेन्टससँग मारियो म्यान्जुकिक, डुगलस कोस्टा, सामी खेडिरा, पाउलो डिब्याला, एलेक्स सान्द्रो, जर्जियो चिलियानी र लियोनार्दाे बोनुची जस्ता खेलाडीहरुको साथ छ ।

यता, साम्पडोरिया युभेन्टसलाई पराजित गर्दै सन् २०१५ पछि सिरी ‘ए’ मा लगातार चौथो जित निकाल्ने योजनामा हुनेछ । साम्पडोरियालले अघिल्ला तीन खेलमा पर्मा, इम्पोली, चिभो भेरोनालाई पराजित गरेको थियो ।

साम्पडोरिया यही लयलाई युभेन्टस विरुद्धको खेलमा पनि निरन्तरता दिने योजनामा हुनेछ । युभेन्टससँग डेनिस प्रायट, फावियो, रिकार्डाे र जियानलुका जस्ता खेलाडीको साथ रहेको छ ।
युभेन्टस १८ खेलबाट ५० अंक जोडेर शीर्ष स्थानमा रहेको छ । उसले दोस्रो स्थानमा रहेको नेपोलीलई ९ अंकले पछि पारेको छ । साम्पडोरिया २९ अंक जोडेर पाँचौ स्थानमा रहेको छ ।

सिरी ‘ए’ का आज रातिका अन्य खेलहरु :

किएभो भेरोना विरुद्ध फ्रोसिनोने (राति ७ः४५ बजे)

इम्पोली विरुद्ध इन्टर मिलान (राति ७ः४५ बजे)

जिनोआ विरुद्ध फियोरेन्टिना (राति ७ः४५ बजे)

लाजियो विरुद्ध टोरिनो (राति ७ः४५ बजे)

पार्मा विरुद्ध रोमा (राति ७ः४५ बजे)

सासुअोलो विरुद्ध एटलान्टा (राति ७ः४५ बजे)

उडिनेजी विरुद्ध कागलियरी (राति ७ः४५ बजे)

नेपोली विरुद्ध बोलोग्ना (राति १०ः४५ बजे)

एसी मिलान विरुद्ध एसपीएएल (आइतबार बिहान १ः१५ बजे)