काठमाडौं (हाम्रो खेलकुद) – १३औं संस्करणको एनएनआइपिए अवार्ड नजिकिदै गर्दा अवार्डले आदर्श समाज विकास केन्द्रको साथ पाएको छ ।

अवार्ड हुन तीन दिन बाँकी रहँदा आयोजक नेपाल राष्ट्रिय तथा अन्तर्राष्ट्रिय खेलाडी संघ (एनएनआइपिए) ले मंगलबार आदर्श विकास केन्द्र नेपालसँग ३ वर्षको लागि सम्झौता हस्ताक्षर गरेको छ ।

सम्झौतामा एनएनआइपिएका अध्यक्ष दीपक श्रेष्ठ र आदर्श बिकासकी प्रमुख सपना लामाले हस्ताक्षर गरिन् । सम्झौता अनुसार आदर्श समाजले एनएनआइपएले वार्षिक १ लाख रुपैयाका दरले तीन वर्षमा ३ लाख उपलब्ध गराउनेछ । १ लाख एनएनआइपिए पत्रकारिता पुरस्कारको २५ हजारसहितअन्य व्यवस्थापनमा खर्च गरिने आयोजकले जनाएको छ ।

सम्झौतापछि आदर्श समाजकी अध्यक्ष सपना लामाले आफु पनि खेल क्षेत्रमा लागेका कारण अवार्डसँग जोडिन पुगेको बताइन् । उनले अवार्डसँग जोडिन पाउनु आफ्नो लागि ठुलो विषय रहेको बताइन् । सपना कराते तथा फुटबलका खेलाडी हुन् ।

एनएनआइपिएका अध्यक्ष दीपक श्रेष्ठले अवार्डमा सहयोगी सस्थाहरु जोडिनु खेलाडीहरुको लागि गौरवको विषय रहेको बताए ।

यसअघि जनता बैंकले पनि उत्कृष्ट मध्येको दुई सर्वोत्कृष्ट खेलाडीलाई जनही १–१ लाख रुपैयाका दरले पुरस्कृत गर्ने सम्झौता भएको थियो ।
एनएनआइपिए खेलाडी सम्मान पुस १३ गते ललितपुर महानगरपालिकास्थित ललितपुर संग्रहालयमा हुनेछ ।

यसपटक गतवर्ष राखेप च्याम्पियनसिपमा समावेश २९ खेलका उत्कृष्ट खेलाडीहरु सम्मानित हुनेछ । यही उत्कृष्ट मध्येबाट १–१ जना सर्वोत्कृष्ट खेलाडी छानिनेछन् । सोही समारोहमा एक जना पाका खेलाडीलाई आदर्श खेलाडीबाट सम्मानित गरिने आयोजकले जनाएको छ ।