एनफिल्ड (एजेन्सी) – युइएफए च्याम्पियन्स लिग फुटबलमा आज राति आठ खेल हुदैछ । आठ खेलमध्ये सबैभन्दा रोमाञ्चक खेल समूह ‘सी’ को हुनेछ ।

समूह ‘सी’ बाट सर्वियन क्लब रेडस्टार बेलग्रेड समूह चरणबाट बाहिरिसक्दा इटालियन क्लब नेपोली, फ्रेन्च क्लब पीएसजी र इंग्लिस क्लब लिभरपुल नकआउट चरण नजिक छ । नेपोलीको ५ खेलबाट ९ अंक छ । पीएसजीको ८ अंक छ । लिभरपुल ६ अंकसहित तेस्रो स्थानमा छ । रेड स्टार ४ अंक जोडेर पुछारमा छ ।

समूहको तेस्रो स्थानमा रहेको इंग्लिस क्लब लिभरपुलले शीर्षस्थानमा रहेको नेपोलीसँग प्रतिस्पर्धा गर्दैछ । यही समूहमा पेरिस सेन्ट जर्मेन (पीएसजी) ले रेडस्टार बेलग्रेडको सामना गर्दैछ ।
लिभरपुलले अर्को चरणमा पुग्ने सम्भावना जीवित राख्न जितको विकल्प छैन । लिभरपुलको जित र पीएसजीको हार भएमा नेपोली र लिभरपुल नकआउट चरणमा प्रवेश गर्नेछ । लिभरपुलले नेपोलीलाई पराजित गर्दै पीएसजी विजयी भएमा पीएसजी र लिभरपुल अघि बढ्नेछ ।

यदि लिभरपुल विजयी भएको अवस्थामा पीएसजी बराबरीमा रोकिएपनि लिभरपुलले अर्काे चरणमा स्थान बनाउनेछ । पीएसजी र नेपोलीमा गोलअन्तरको आधारमा दोस्रो स्थानको टोली टुंगो लाग्नेछ । नेपोलीसँग बराबरी या हार भोगेको अवस्थामा भने लिभरपुल बाहिरिनेछ ।

घरेलु मैदान एनफिल्डमा लिभरपुल नेपोलीलाई पराजित गर्ने लक्ष्यमा मैदान उत्रनेछ । प्रिमियर लिगमा बोर्नमाउथलाई ४–० ले पराजित गर्दै उच्च मनोवलमा रहेको लिभरपुल सोही प्रदर्शनलाई निरन्तरता दिने योजनामा हुनेछ । लिभरपुलसँग साडियो माने, मोहम्मद सलाह, रोबर्टाे फिर्मिनो जरदान शाकिरी, भर्जिल भान डिजिक, जेम्स मिल्नर र एलिसन बेकरजस्ता खेलाडीहरु रहेका छन् ।

यता, नेपोली लिभरपुललाई घरेलु मैदानमा पराजित गर्दै नकआउट चरणको यात्रा सुरक्षित गर्न चहान्छ । बराबरीले पनि नेपोली नकआउट चरणमा प्रवेश गर्नेछ ।
यही समूहको अर्काे खेलमा फ्रेन्च क्लब पीएसजीले रेडस्टारसँग प्रतिस्पर्धा गर्दैछ । पीएसजी रेडस्टारलाई पराजित गर्दै नकआउट चरण पुग्ने लक्ष्यमा मैदान उत्रनेछ ।