काठमाडौं (हाम्रो खेलकुद) – नेपालका शीर्ष वरीयताका रत्नजित तामाङ र दिपेश धामी राजधानीमा आजबाट शुरु भएको योनेक्स सनराईज नेपाल इन्टरनेशनल ब्याडमिन्टन सिरिजको दोस्रो चरणमा प्रवेश गरेका छन् ।

हल्चोकस्थित सशस्त्र प्रहरी बल (एपीएफ) को कभर्डहलमा मंगलबार नेपाली शीर्ष वरीयताका रत्नजित तामाङले भारतका धुरव कुमारलाई २–१ को सेटमा पराजित गर्दै दोस्रो चरणमा प्रवेश गरेका हुन् । रत्नले धुरवमाथि २२–२०, २२–२४ र २१–१४ को जित निकालेका हुन् । दोस्रो वरीयताका दिपेशले माल्दिभ्सका अहमेद निवलमाथि २१–८ र २१–११ को सहज जित निकालेका हुन् ।

यस्तै नेपालका विकास श्रेष्ठ, विजित थापामगर, प्रफुल महर्जन, प्रिन्स दाहाल र नविन श्रेष्ठले पनि आ–आफ्ना प्रतिद्धन्द्धीलाई पराजित गर्दै दोस्रो चरणमा प्रवेश गरेका छन् । पुरुष एकलमा विकासले माल्दिभ्सका सरिम मोहमेदलाई २१–१५ र २१–७ को सेटमा जित निकाल्यो ।

यस्तै विजितले भुटानका सुभेरसन लामालाई २१–१९ र २१–७, प्रफुलले मरिससका क्रिस्टोफर पउललाई २१–१९ र २१–१४, प्रिन्सले बंगलादेशका मंगल सिंहलाई २१–१५, १५–२१ र २१–९ ले पराजित गरे । नविन श्रेष्ठले बंगलादेशका मोहम्मद सलमान खानलाई २१–१५ र २१–१९ को सेटमा पाखा लगाए ।

नेपालका साजन ताम्राकार, सुनिल जोशी, रुकेश महर्जन, दीपक बोहरा, इरफान अन्सारी र गौतम कठायत भने पहिलो चरणमा पराजित भएका छन् ।

त्यसअघि पुरुष एकलको छनोटमा नेपालका सुदिप सेढाईं बंगलादेशका गौरव सिंहसँग १५–२१, २३–२१ र २१–१६ ले पराजित भए । महिलाकै छनोटमा नेपालकी सम्झना शर्मा र सिमा राजवंशी पराजित भइन् ।