काठमाडौं (हाम्रो खेलकुद) – जाकार्तामा जारी एसिया प्यासिफिक सितोरियो कराते प्रतियोगिताको सिनियर एकल कातामा नेपालका पर्शुराम बास्तोलाले कास्य पदक प्राप्त गरेका छन् ।

नेपाली राष्ट्रिय टिमका कप्तान समेत रहेका पर्शुराम बास्तोलाले कास्यपदकका लागि भएको खेलमा चाइनिज ताइपेइका खेलाडीलाई ४–१ ले पराजित गर्दै कास्य जित्न सफल भएका हुन् ।

उनले यसअघि आयोजक इन्डोनेसियालाई ३–२ र श्रीलंकालाई ५–० ले पराजित गर्दै सेमिफाइनलमा पुगेका थिए । तर, बास्तोला सेमिफाइनलमा जापानसँग पराजित हुन पुगे ।

त्यसपछि उनले कास्य पदकको लागि प्रतिस्पर्धा गरेका थिए । कास्य पदकका लागि भएको प्रतिष्पर्धामा चाइनिज ताईपेईलाई ४–१ ले पछि पार्दै नेपाललाई कास्य पदक दिलाउन सफल भएको प्रशिक्षक अशोक पहाडीले बताए ।

बास्तोलाले यसअघि अन्तर्राष्ट्रिय अनुभवका लागि क्यानडाको भ्यागकुवरमा नोभेम्बर १७ मा भएको सातौँ कप अन्तर्राष्ट्रिय कराते प्रतियोगितामा सिनियर एकल कातामा स्वर्ण हात पारेका थिए । प्रतियोगितामा काता विधाको ग्रान च्याम्पियनको ट्रफि समेत हात पारेका थिए ।

जाकार्तामा जारी प्रतियोगितामा ६० किलो तौल समूहमा नेपालका अनिस लामाले समेत कास्य पदक हात पारेका छन् । पहिलो खेलमा इन्डोनेसियाका खेलाडीलाई ६–४ ले पराजित गरेका लामा जापानसँग १०–४ ले पछि परेको नेपाल कराते महासंघका अध्यक्ष दावा गुरुङले जानकारी दिए ।

दिगम्वर प्रसाद पन्तले फिलिपिन्सलाई ८–० ले पराजित गर्दै कास्य पदक जिते । उनले त्यसअघि सिंगापुरलाई ८–० ले पछि पारेको थियो । इन्डोनेसियासँग ४–६ ले पराजित भएका थिए ।