काठमाडौं (हाम्रो खेलकुद) – दाङका अभिषेक सुनार र सुनसरीका विशाल राई प्रथम नोभिष राष्ट्रिय बक्सिङ प्रतियोगिताको सेमिफाइनलमा प्रवेश गरेका छन् ।

त्रिपुरेश्वस्थित राखेपको कभर्डहलमा शुक्रबार भएको पुरुष यू–२४ को ४९ केजीको खेलमा अभिसेकले रामेछापका सुरज स्याङताङलाई अंकका अधारमा पराजित गर्दै अन्मित चारमा पुग्न सफल भएका हुन् । यही उमेर समूहको यही तौल समूहमा विशालले गुल्मीका कुमार बुढामगरलाई अंककै आधारमा हराए ।

पुरुष ४९ केजीमा काठमाडौं बक्सिङ क्लबका दिपेस राई पनि सेमिफाइनलमा प्रवेश गरेका छन् । पुरुष यू–२४ कै ५२ केजीको खेलबाट सफलता हात पादै ललितपुरका बुद्ध लामा, दाङका पदम साही,जिमखानाका अभिषेक अधिकारी र केन्द्रिय बक्सिङका जिवन पुन पनि सेमिफाइनलमा प्रवेश गरेका छन् ।

पुरुष यू–२४ को ५६ केजीमा कास्कीका पुरन राजकोट, सुनसरीका रविन धिमिरे, भक्तपुरका सुजन पौडेल र प्लाटिनियमका डिकेस लामा सेमिफाइनलमा प्रवेश गरे ।

पुरुष यू–२४ को ६४ केजीको स्प्रर्धामा नक्सालका मनिस भण्डारी, कास्कीका पवन गुरुङ, केन्द्रिय बक्सिङका कमल श्रेष्ठ र नक्सालका विवेक सिंहले सेमिफाइनलमा स्थान बनाउन सफल भए ।

पुरुष यू–२४ को ७५ केजीमा मेघदुतका एमन महर्जन, टिकाथलीका प्रिन्स खड्का, दाङका गणेश विक र प्लाटिनियमका सुमन महर्जनले आ–आफ्नो खेलमा जित निकाल्दै सेमिफाइनलमा स्थान बनाए ।

महिला यू–१९ को ४८ केजीको क्वाटरफाईनल खेलमा दाङकी सुशिला थापा र नक्सालका रमिता श्रेष्ठले सेमिफाइनलमा स्थान बनाइन् । महिला यू–१९ को ५१ केजीको क्वाटरफाईनल खेलमा झापाकी अरुण योन्जन र नक्सालकी तेजी गुरुङले सेमिफाईलमा स्थान सुरक्षित गरिन् ।