काठमाडौं (हाम्रो खेलकुद) – तेस्रो संस्करणको रोजवड उपत्यकाव्यापी बास्केटबल प्रतियोगिता शनिबारदेखि सुरु हुने भएको छ ।

आयोजक रोजबड स्कुलले काठमाडौंमा पत्रकार सम्मेलन गर्दै तेस्रो संस्करणको पुरुष तथा महिला बास्केटबल प्रतियोगिता आयोजना गर्ने जानकारी गराउँदै प्रतियोगिताको सम्पूर्ण तयारी पूरा भएको पनि जानकारी गराएको छ । प्रतियोगिता मंसिर ८ गतेदेखि १७ गतेसम्म आयोजक रोजवड स्कुलकै प्राङ्गणमा आयोजना हुनेछ ।

प्रतियोगितामा पुरुषतर्फ १६ स्कुल र महिलातर्फ ५ स्कुलले सहभागिता जनाउने प्रतियोगिता संयोजक बेनी कार्कीले जानकारी गराए ।  प्रतियोगितामा कक्षा ११ र १२ मा पढ्ने  नियमित विद्यार्थीले मात्रै भाग लिन पाउनेछन् । प्रतियोगितालाई निस्पक्ष बनाउँ २०७३ र ७४ सालमा एसईई परिक्षा दिएकालाई मात्र सहभागी गराइनेछ । सहभागी १६ स्कुललाई ४ समूहमा विभाजन गरिएको छ । लिग कम नकआउटको आधारमा हुने प्रतिस्पर्धामा हरेक समूहका शीर्ष दुई टोलीले क्वाटरफाइनलमा स्थान बनाउनेछ ।

ब्वाइजतर्फ समूह ए मा सिसिआरसी कलेज, न्यु समिट कलेज, ज्ञान निकेतन कलेज, सेन्ट जेभियर स्कुल रहेका छन् । समूह ‘बी’ मा ट्रिनिटी कलेज, क्याम्पियन एकेडेमी, मोर्गान कलेज र एस कलेज छन् । समूह ‘सी’ मा टाइम्स कलेज, ट्रिटन कलेज, बर्न हार्ट कलेज र साइपाल एकेडेमी छन् । समूह ‘डी’ मा गोल्डेनगेट कलेज, आयोजक रोजबड स्कुल, ह्वाइट हाउस कलेज र जेभियर इन्टरनेसनल कलेज रहेका छन् ।

गर्ल्सतर्फ साइपाल एकेडेमी, मोर्गान कलेज, एस स्कुल, जेभियर इन्टर नेसनल कलेज र ट्रिनिट कलेज रहेका छन् । खेल राउन्ड रोविन लिगको आधारमा हुनेछ ।

विजेताले ट्रफीसहित आकर्षक पुरस्कारको व्यवस्था गरिएको विद्यालयका प्रिनिसपल दामोदर ढुङ्गानाले जानकारी गराए । उनले अर्काे वर्षबाट रोजवडको महिला टिम तयार पारिने बताए ।  प्रतियोगिता सञ्चालन गर्न करिव २ लाख ५० हजार खर्च लाग्ने आयोजकले अनुमान गरेको छ ।