काठमाडौं (हाम्रो खेलकुद) – नेपाल पुलिस क्लबका मन्डेकाजी श्रेष्ठ र चञ्चल दनुवारले बागलुङमा जारी प्रथम गाउँपालिका अध्यक्ष राष्ट्रिय कराते कप च्याम्पियनसिपम स्वर्ण जितेका छन् ।

श्रेष्ठले प्रतियोगिता अन्तरगत ब्यक्तिगत कातामा प्रदेश नं. ५ का दीप राज थापालाई पन्छाउँदै स्वर्ण हात पारेका हुन् । एपिएफका अनिल चन्द र प्रदेश २ का दिर्घ बहादुर लामाले तेस्रो स्थान हात पारे । मन्डेले पुरुष टिम कातामा पनि स्वर्ण हात पारे । उनले महसुस तामाङर विनोद गुरुङसँग मिलेर स्वर्ण जित्न सफल भएका हुन् ।

यस्तै आईतबारै भएको महिला ब्यक्तिगत काताामा नेपाल प्रहरीकी चन्चला दनुवार एपिएफकी सरिता श्रेष्ठलाई पराजित गर्दै स्वर्ण हात पार्न सफल भईन् । बाग्लुङकी सर्मिला श्रेष्ठ र प्रदेश ५ की रश्मि पाण्डेले तेस्रो स्थान हात पारिन् ।

टिम काताको पुरुष र महिला दुवैतर्फ नेपाल पुलिसले स्वर्ण हात पारेको श्रेष्ठले जानकारी गराए । पुरुष तर्फ दोश्रो स्थानमा प्रदेश नं. १ तथा तेश्रो स्थानमा प्रदेश ७ र ५ रहे । महिला तर्फ प्रदेश नं. ६ ले रजत पाए । एपिएफ र प्रदेश ५ ले कास्य पाए ।

७ प्रदेश र ३ विभागिय टिम गरि १० टिमको सहभागिता रहेको प्रतियोगिताको कुमुते महिला ४५ केजी तौलमा एपिएफकी जिया कार्कीले बाजी मारिन् । उनले पुलिसकी बुद्धलक्ष्मी तामाङ्गलाई पराजित गर्दै स्वर्ण पाएकी हुन् ।

प्रदेश ५ की रश्मि पाण्डे र प्रदेश १ की रञ्जना मगरले कास्य पाए । यस्तै पुरुषको ५० केजीमा पुलिका सोनाम लामाले स्वर्ण पाए । प्रदेश १ का मोहन यादवले रजत तथा प्रदेश ६ का सरोज पासवान र आयोजकका अंकित गुरुङले कास्यमा चित्त बुझाए ।