काठमाडौं (हाम्रो खेलकुद)– राष्ट्रिय खेलकुद परिषद् (राखेप) का नवनियुक्त उपाध्यक्ष पिताम्बर तिम्सिनाले देशको प्रतिष्ठा अन्तर्राष्ट्रिय जगतमा उचो बनाउन सफल तेक्वान्दो संघ विवादमा पर्नु दुर्भाग्य भएको बताएका छन् ।

नेपाल तेक्वान्दो संघले आफु र राखेप सदस्य इन्दिरा निरौलाको स्वागत र शुभकामना दिन शनिबार आयोजित कार्यक्रममा तिम्सिनाले भने, खेल र खेलाडीको अहित हुने कुनै पनि काम गर्ने छैन । खेलको विकासका लागि प्रयास गर्नेछु । राखेपले हालै मात्र नेपाल तेक्वान्दो संघ र राष्ट्रिय तेक्वान्दो संघलाई समान हैसियता संघ भन्दै मिलेर अघि बढ्न एक साताको अल्टिमेटम दिएको छ ।

तर, नेपाल तेक्वान्दो संघ भने राष्ट्रिय संघसँग मिलेर जान नसकिने बताउँदै आएको छ । युवराज लामा सदस्य सचिव भएका बखत तेक्वान्दो संघ अस्तित्वमा रहँदा रहँदै २०६७ मा राष्ट्रिय तेक्वान्दो युनियनलाई राखेपमा दर्ता दिइएको थियो । त्यति मात्र होइन, २०६८ मा भएको छैटौं राष्ट्रिय खेलकुदमा सुरुमा प्रदर्शनी खेल भनिएपछि पछि पदक तालिकामा समावेश गरिएको थियो ।

केहि महिना अघि इन्डोनेसियामा भएको १८ औं एसियाली खेलकुदको सहभागिताका विषयमा पनि तेक्वान्दोलाई विवादमा पार्ने प्रयास भएको थियो । तर, पछि राखेप र नेपाल ओलम्पिक कमिटी (एनओसी) ले नेपाल तेक्वान्दो संघले सिफारिस गरेका खेलाडीलाई मात्र एसियाडमा सहभागि गराएको थियो ।

अहिले भने राखेपले आठौं राष्ट्रिय खेलकुदका लागि दुवै संघले मर्ज गरेर अघि बढ्नु पर्ने आशायको पत्र काटेको थियो । स्वागत कार्यक्रममा संघका महासचिव दिपराज गुरुङले तेक्वान्दो खेलको सफलतालाई मध्यनजर गर्दै तेक्वान्दोमा अनावश्यक विवाद निम्त्याउने काम गर्न नहुने बताए ।
कार्यक्रममा राखेपका नवनियुक्त सदस्य राजेश गुरुङलाई पनि स्वागत गर्ने कार्यक्रम रहेपनि उनी भने पोखरामा रहेका कारण उपस्थित नरहेको बताइएको थियो ।