काठमाडौं (हाम्रो खेलकुद) – नेपालको सिएमजी भेट्रान क्लबले भारतको गुवाहटीमा भैरहेको अन्तर्राष्ट्रिय भेट्रान फुटबल प्रतियोगिताको सेमिफाइनलमा प्रवेश गरेको छ ।

समूह चरणको अन्तिम खेलमा कक्रझार गुहावटी आसामलाई १–० ले पराजित गर्दै सएमजी भेट्रान क्लब अन्तिम चारमा पुग्न सफल भएको हो । नेपालको जितमा बालगोपाल महर्जनले निर्णायक गोल गरे । नेपालले अब आइतबार सेमिफाइनल तथा फाइनल खेल खेल्ने तालिका रहेको बालगोपाल महर्जनले जानकारी गराए । नेपालले शुक्रबार डिमापुरलाई २–१ ले तथा मेट्रो आसामसँग गोलरहित बराबरी खेलेको थियो ।

लिग कम नकआउटका आधारमा हुने प्रतियोगितामा सहभागी ८ टोलीको सहभागिता रहेको छ ।  युनाइटेड ब्रदर्श क्लबको आयोजनामा हुन लागेको पाँचौ संस्करणको भेट्रान फुटबल प्रतियोगिताको लागि नेपालको सिएमजी भेट्रान क्लबको टोली बुधबार त्यसतर्फ प्रस्थान गरेको थियो ।

प्रतियोगिता १८ नोभेम्वरसम्म चल्नेछ । प्रतियोगितामा नेपालसहित, भारतको मनिपुर, कोलकत्ता, नयाँ दिल्ली, भुटान र बंगलादेशको भेट्रान टोली गरी ८ टोलीको सहभागिता रहनेछ । प्रतियोगिताको विजेताले ५० हजार र दोस्रो हुनेले ३० हजार रुपैया प्राप्त गर्नेछ । प्रतियोगिताको उत्कृष्ट खेलाडी, उत्कृष्ट गोलरक्षक र सर्वाधिक गोलकर्ताले आकर्षक उपहार प्राप्त गर्नेछ ।