काठमाडौं (हाम्रो खेलकुद)– नेपाली महिला टोलीले पहिलो सहभागितामै अक्सफाम ट्रेलवाकरमामा दोस्रो स्थान प्राप्त गर्न सफल भएको छ । अल्ट्रा दौडमा चर्चा कमाएकी मिरा राईको पहलमा भाग लिएको नेपाली टोलीले शुक्रबार १ सय किलोमिटर ट्रेलवाकरमा दोस्रो स्थान प्राप्त गरेको हो । यसअघि पहिलो स्थान हात पार्दै आएको पुरुष टोली पनि यसपटक दोस्रो स्थानमा चित्त बुझाउन बाध्य भयो ।

जुम्लाकी सुनमाया बुढा, धादिङकी रसिला तामाङ, सोलुखुम्बकी छेची शेर्पा राई र ओखलढुंगाकी छोकी शेर्पाको टोली १६ घन्टा ३२ मिनेट १० सेकेन्डमा दौड पुरा गर्दै दोस्रो भएको थियो । मिरा राईका अनुसार हङकङकै टोली पहिलो भएको थियो ।

अक्सफामा नेपाली पुरुष खेलाडीले उच्च प्रदर्शन गर्दै आइरहेका थिए भने नेपाली महिलाहरुले पहिलो पटक भाग लिएका हुन् । ‘अक्सफामको ३२ वर्ष लामो इतिहासमा पहिलो पटक नेपाली महिला टोलीलार्ई सहभागिता गराउन सकेकोमा खुसी हुँदै मिराले भनिन्, पहिलो सहभागितामै हामीले यो सफलता प्राप्त गरेका छौं । यो ठूलो उपलब्धी हो । नेपाली महिला पनि उत्तिकै सक्षम छन् भन्ने प्रमाणित भएको छ ।’

अल्ट्रा दौडमा नाम कमाएकी मिराले अब नयाँ पुस्तालार्ई अघि बढ्न सहयोग गर्ने उद्देश्यका साथ मिरा राई इनिसियटिभको स्थापना गरेको र त्यहिमार्फत यसपटक नेपाली टोलीलाई सहभागी गराएको जानकारी हाम्रो खेलकुदलाई दिइन् । उनले भनिन्, ‘हककङको एसपिए भन्ने कम्पनीले हाम्रो खेलाडीको सबै खर्च बेहोरेको छ ।’

अर्को तर्फ यसअघि दुई पटक च्याम्पियन रहेको नेपाली पुरुष टोली यसपटक दोस्रो भएको छ । नेपाली सेनाका समिर तामाङ, उत्तम खत्री, पूर्ण तामाङ र सोलखुम्बुका सुमन कुलुङको टोलीले १२ घन्टा ८ मिनेटमा दौड पुरा गरेको थियो । समिरले ९३ किलोमिटर सम्म अग्रता राखेर पनि अन्तिममा दोस्रो स्थानमा चित्त बुझाउनु परेको बताए । ‘

हामी जित्नेमा ढुक्क जस्तै थियौं । सायद त्यहि ओभर कन्फिडेन्सले अघि घाटा पनि भयौ,’ उनले हाम्रो खेलकुदसँग भने, ह्याट्रिक गर्ने दाउमा आएका थियौं । तर सफल हुन सकिएन । ’ फ्रान्स, हङकङ र अन्य देशका खेलाडी सम्मिलित टोलीसँग १३ मिनेटले पछि पर्दै दोस्रो भएको समिरले बताए ।