धनगढी, चैत ५
सिवाइसी अत्तरिया सगरमाथा सिमेन्ट धनगढी क्रिकेट लिग भाग तीनमा दोस्रो स्थानमा उक्लिएको छ ।
धनगढीस्थित अञ्चल प्रहरीको खेल मैदानमा शुक्रबार भएको पहिलो खेलमा सन्तोषी टोल माथि ८ विकेटको फराकिलो जित निकाल्दै अत्तरिया दोस्रो स्थानमा उक्लिएको हो ।

अत्तरियाको सात अंक छ । शीर्ष स्थानको क्याम्पस रोडको ८ अंक छ । बर्षाले खेल ढिलो सुरु भएपछि १६ ओभरमा घटाईएको खेलमा सन्तोषी टोलले दिएको १३२ रनको लक्ष्य अत्तरियाले १२.३ ओभरमादुई विकेट गुमाएर भेट्टायो । अत्तरियाको जितमा ज्ञानेन्द्र कुवँरले अविजित ६१ रनको पारी खेले । त्यस्तै मेहबुव आलमले विष्फोटक ब्याटिङ गर्दै १८ बलमा ४० रनको पारी खेलेर टिमलाई सहज जित दिलाए । सन्तोषी टोलका महेश अधिकारीले १ विकेट लिए ।

यसअघि टस हारेर पहिले ब्याटिङमा उत्रेको सन्तोषी टोलले २ विकेट गुमाएर १ सय ३१ रन बनायो । उसका लागि ओपनर ब्याट्सम्यान विजय रानाले ५५ रनको इनिङ खेले । अमित साहुले ३२ रन तथा युवराज थापाले १३ रन जोडे । अत्तरियाका मेहबुब आलमले १ विकेट लिए ।

यस्तै शुक्रबारै भएको अर्काे खेलमा क्याम्पसरोडले चौराहामाथि माथि ५ रनको रोमाञ्चक जित निकाल्यो । १०८ रनको लक्ष्य पछ्याएको चौराहाले २० ओभरमा ७ विकेट गुमाएर १ सय २ रन मात्र बनाउँन सक्यो । चौराहाका योगेन्द्र सिंह कार्कीले ३६ तथा दिपेश चन्दले १९ रन बनाए । चन्द्र सावँद, सन्तोष भट्ट, ललित सिंह भण्डारी तथा शिबराज ऐरले समान १ विकेट पाए ।
यसअघि टस जितेर पहिले ब्याटिङ गरेको क्याम्पसरोडले निर्धारित २० ओभरमा ७ विकेट गुमाएर १ सय ७ रन बनायो । क्याम्पसरोडका लागि कप्तान रोमन बलमे ३६, ललित सिंह भण्डारीले १४, तथा चन्द्र सावँदले १३ रन बनाए । चौराहाका योगेन्द्र सिंह कार्कीले ३ विकेट लिए भने सोनु तामाङले २ विकेट लिए ।