पोखरा (हाम्रो खेलकुद) – हुलास काठमाडौं रोयल्सले पोखरामा जारी नमस्ते पोखरा प्रिमियर लिग (पीपीएल) टी–२० क्रिकेट प्रतियोगितामा बुटवल ब्लास्टर्सलाई ३७ रनले पराजित गर्दै प्लेअफ नजिक पुगेको छ ।

वसन्त रेग्मी र ज्ञानेन्द्र मल्ल

काठमाडौंले प्रस्तुत गरेको १ सय ७३ रनको लक्ष्य पछ्याउने क्रममा बुटवलले २० ओभरमा ९ विकेट गुमाउँदै १ सय ३५ रनमात्र जोड्न सक्यो । यस जितसँगै काठमाडौं अंक तालिकाको शीर्ष स्थानमा उक्लिएको छ । लिगको अन्तिम खेलमा शनिबार पोखरा पल्टनसँग खेलेपछि मात्र प्लेअफ वा फाइनल पुग्ने समीकरण टुङ्गो लाग्नेछ । पराजित टोली बुटवलको पनि प्लेअफ पुग्ने गणितीय सम्भावना भने जिवितै छ । सुरुवाती दुई खेल जितेको बुटवल लगातार तेस्रो हारसँगै प्लेअफ पुग्न अन्य खेलको नतिजामा भर हुनेछ ।

ओपनर सागर पुनलाई तेस्रो ओभरमा १ रनमा गुमाएको बुटवलका लागि यूएईका चिराग सुरी र रोहन मुस्तफाले दोस्रो विकेटका लागि ५१ रनको साझेदारी गरेका थिए । चिराग नवौं ओभरमा ११ रन जोड्दै वसन्त रेग्मीको बलमा एलबीडब्लु भए । त्यसपछि लगातार विकेट गुमाएपछि बुटवलले खेलमा पकड गुमाएको थियो । बुटवलका लागि भीम सार्कीले १२, सिद्धान्त लोहनीले १३, कप्तान सोमपाल कामीले ४ तथा शंकर रानाले ४ रनमात्र जोडे । रोहन मुस्तफाले सर्वाधिक ६१ रनको योगदान दिए । ५१ बलमा ५ चौका र ४ छक्का प्रहार गरेका मुस्तफा वसन्तको बलमै एलबीडब्लु भए । काठमाडौंका लागि अमरसिंह राउटेलाले ३ तथा वसन्त रेग्मी र नन्दन यादवले २-२ विकेट लिए । गौरव तोमरले पनि १ विकेट हात पारे ।

रोहन मुस्तफा

त्यसअघि टस जितेर पहिले ब्याटिङ गरेको काठमाडौंले निर्धारित २० ओभरमा ४ विकेट गुमाएर १ सय ७२ रन बनाएको थियो । काठमाडौंका लागि नरेश बुढाएरले ५८ रनको अविजित अर्धशतकीय इनिङ्स खेले । नरेशले २८ बलमा ५ छक्का र ३ चौका हिर्काए । कप्तान ज्ञानेन्द्र मल्ल २४ रनमा रनमा नटआउट रहे । कप्तान मल्लले १३ बलमा २ चौका र १ छक्का हिर्काए ।

ओपनर जयकिसन कोल्सावालाले ४५ रनको योगदान दिए । ३५ बलमा कोल्सावालाले ३ चौका २ छक्का प्रहार गरे । अघिल्ला खेलमा उच्च प्रदर्शन गरेका गौरव तमोर ११ रनमा आउट भए । ओपनर अमित श्रेष्ठ ४ रनमा आउट भए । विपीन खत्रीले २ विकेट लिए । रोहन मुस्ताफा र मोहम्मद संसाद शेखले १ विकेट लिए ।

नरेश बुढाएर