काठमाडौं (हाम्रो खेलकुद) – ललितपुरमा जारी साफ यु–१५ फुटबल च्याम्पियनसिपको सेमिफाइनलमा नेपालले पाकिस्तान प्रतिद्धन्द्धी पाएको छ । सोमबार १० खेलाडीमा समेटिएको बंगलादेशसँग २–१ ले पराजित भएसँगै नेपाल समूह ‘ए’ को उप विजेता बनेपछि नेपालले पाकिस्तान प्रतिद्वन्द्वी पाएको हो ।

सातदोबाटोस्थित एन्फा कम्प्लेक्सको खेल मैदानमा सोमबार भएको खेलमा बंगलादेशले खेलको शुरुवातमै मोहम्मद आहाद सकिलको गोलबाट अग्रता बनाएको थियो । ३६औं मिनेटमा जान लिम्बुले पेनाल्टीमार्फत गोल गर्दै खेललाई १–१ गोलको बराबरीमा ल्याएका थिए ।

बंगलादेशका गोलरक्षक मितुल मार्माले राकेश विश्वकर्मालाई फल गरेपछि नेपालले पेनाल्टीको मौका पाउदा रेफ्रीले गोलरक्षकलाई सोझै रातो कार्ड देखाएर मैदान बाहिर पठाएका थिए । तर, १० खेलाडीमा समेटिएपनि नेपालले फेरि दोस्रो हाफको शुरुवातमै गोल खान पुग्यो । बंगलादेशका हवल्दारले गोल गरेका थिए । त्यसपछि नेपालले पटकपटक पोस्ट आक्रमण बुनेपनि गोल गर्न असमर्थ रहँदा पराजित हुन पुग्यो ।

नेपाली टोलीका प्रशिक्षक सनोज श्रेष्ठले पाएको मौकालाई सदुयोग गर्न नसक्दा पराजित हुनु परेको बताए । ‘हामीलाई १० खेलाडीमा समेटिएको फाइदा थियो । पटक पटक प्रयास गरेपनि हामीले सफलता हात पार्न सकेनौं, ।’ प्रशिक्षक श्रेष्ठले खेलपछि भने ।

बंगलादेशका प्रशिक्षक मुस्ताफा अनवर पर्भेजले पहिलो हाफमै टिम १० खेलाडीमा समेटिएपनि आत्मविश्वासी भएर खेल्दा जित हात पार्न सकिएको बताए । उनले रातो कार्ड खाएपछि केही समय खेलाडी अत्तालिएको जस्तो देखिएको थियो । तर, टोलीले बलियो नेपालविरुद्ध उत्कृष्ट खेल खेलेको बताए ।

सोमबौ भारतले भुटानलाई ४–० ले पराजित गर्दै अन्तिम चारमा पुग्न सफल भयो । सेमिफाइनलका खेल बुधबार हुनेछ । पहिलो सेमिफाइनलमा समूहको विजेता बंगलादेश र समूह ‘बी’ को उपविजेता भारतबीच खेल हुनेछ । दोस्रो सेमिफाइनलमा समूह ‘बी’ को विजेता पाकिस्तान र समूह ‘ए’ को उपविजेता नेपालबीच खेल हुनेछ ।