काठमाडौं (हाम्रो खेलकुद) – नेपाली यू-१९ महिला राष्ट्रिय फुटबल टोलीले थाइल्याण्डमा जारी एएफसी यू-१९ च्याम्पियनसिपको छनोटमा ऐतिहासिक सफलता हात पारेको छ । नेपाल छनोटको दोस्रो चरणमा प्रवेश गरेको छ ।

समूहको अन्तिम खेलमा भारतले थाइल्याण्डलाई १-० ले मात्र पराजित गरेपछि पनि नेपाल दोस्रो चरणमा छनोट भएको हो । यसअघिको खेलमा नेपालले भारतलाई २-० ले पराजित गरेको थियो भने थाइल्याण्डले नेपाललाई ३-० ले हराएको थियो । नेपाल, थाइल्याण्ड र भारत तीनै टोलीले पाकिस्तानलाई भने फराकिलो अन्तरले हराएका थिए । तीनै टोलीको समान ६-६ अंक भएपछि समूह विजेताको छिनोफानो गर्न तीन टोलीको नतिजा मात्र हेरिएको थियो ।

प्रतियोगिता नियमावली अनुसार तीन टोलीको मात्र नतिजा हेर्दा थाइल्याण्ड समूह विजेता, नेपाल समूह उपविजेता र भारत तेस्रो स्थानमा रहेको हो । थाइल्याण्ड समूह विजेता भएसँगै नेपाल अन्तिम चरणमा छनोट हुने पक्का भएको हो । प्रतियोगिताको अन्तिम चरण पनि थाइल्याण्डमा नै हुने भएकोले यस समूहको दोस्रो टोलीले सिधै अर्को चरणमा स्थान बनाउने प्रावधान रहेको छ । आइतबारको खेलमा नेपालले पाकिस्तानलाई ९-० ले हराएको थियो ।

सबै समूहको शीर्ष टोलीबाहेक उत्कृष्ट दुई दोस्रो स्थानको टोलीले पनि छनोट हुने प्रावधान रहेको थियो । यदि थाइल्याण्ड दोस्रो हुने उत्कृष्ट २ मा पारेको भए तेस्रो टोलीले छनोट हुने थियो । यस नतिजासँगै नेपाल दोस्रो चरणमा छनोट भएको छ भने भारत समूह चरणबाट नै बाहिरिएको छ ।

नेपालले पहिलो पटक एएफसी यू-१९ च्याम्पियनसिपको छनोटमा सहभागिता जनाएको हो । पहिलो सहभागितामा नै नेपाली टोलीले ऐतिहासिक नतिजा प्राप्त गरेको हो । अब अन्तिम चरणमा छनोट हुन नेपालले अप्रिल २०१९ मा हुने छनोट चरण पार गर्नुपर्ने छ ‌।