काठमाडौं, चैत ३ । नेपाल खेलकुद महासंघले १३औं साग तयारी र आवश्यक पूर्वाधारको लागि सरकारलाई सुझावमुखी विशेष अन्तरक्रिया कार्यक्रम गरेको छ ।

राजधानीमा बुधबार नेपाल खेलकुद महासंघले एक कार्यक्रमको आयोजना गर्दै नेपालमा हुने १३औं साग तयारी र त्यसका निम्ती आवश्यक पूर्वाधारलाई छिट्टै तयारी थाल्न सुझाव दिएको हो । संघले दक्षिण एसियाका राष्ट्रहरुसँग प्रतिस्पर्धा, व्यवस्थापनसहित उत्साहजनक सहभागिता र नतिजाको लागि तयारी गर्नुपर्ने तर्क राखे । यस्तै कार्यक्रममा कुनै पनि प्रतियोगिताको लागि बजेट निकासा समयमै हुनुपर्ने, खेलाडी हकहितको तथा समयमै तयारीमा जुट्न आह्वान गरेको छ । कार्यक्रममा युवा तथा खेलकुद मन्त्री सत्यानारायण मण्डलले कम बजेट विनियोजनका कारण खेलुकदको विकास गर्न नसकिएको बताउदै १३औं सागका लागि सरकारले भौतिक संरचना र खेलाडी प्रशिक्षणमा आवश्यक बजेट छुट्याउनु पर्नेमा जोड दिए । उनले अन्य मन्त्रालयरुको तुलनामा खेलकुद मन्त्रालयलाई हेर्ने दृष्टिकोण बजेटको हिसावमा राम्रो नरहेको बताए ।
यस्तै राष्ट्रिय खेलकुद परिषद्का सदस्य–सचिव केशवकुमार विष्टले १३औं साग खेलकुद प्रतियोगिता आयोजना गर्न भौतिक पूर्वाधारको निर्माण विना सागको आयोजना गर्न गाह्रो हुने बताए । ‘पुरानै ढर्राबाट १३औं सागको आयोजना भए । सबैको हासोका पात्र बन्नेछ ।’ सदस्य–सचिव विष्टले भने, दुई वर्षको समय सागको तयारकिा लागि पर्याप्त हैन । तर, हामी दुईवर्षभित्रै आयोजना हुने गरी लक्ष्यमा राखेर कामको सुरुआत गर्नेछौ । त्यसमा एकदुई महिना तलमाथि हुन सक्नेछ ।’
१३औ साग गर्नका लागि उपयुक्त भौतिक संरचना नभएको अवस्थालाई ध्यानमा राखि नेपाल सरकार, युवा तथा खेलकुद मन्त्रालय र राष्ट्रिय खेलकुद परिषद् गम्भिरताका साथ लाग्न कार्यक्रममा उपस्थित बक्ताहरुले सुझाव दिएका थिए ।