काठमाडौं (हाम्रो खेलकुद) – अखिल नेपाल फुटबल संघ (एन्फा) र कतार फुटबल एसोसिएसन (क्युएफए) ले दुवै देशको फुटबल बिकासका लागि बुधबार पाँच वर्षको लागि सम्झौता गरेको छ ।

कतार फुटबल एसोसिएसनको मुख्यालय दोहामा एन्फाका अध्यक्ष कर्मा छिरिङ शेर्पा र क्युएफएका अध्यक्ष हमाद बिन खालिफा बिन अहमेद अल तानीले सम्झौता पत्रमा हस्ताक्षर गरेका हुन् ।

सम्झौतामा दुई राष्ट्रबीच फुटबल व्यवस्थापन, टेक्निकल, प्रशिक्षक, रेफ्री र खेलाडीको आदान–प्रदानसहित विभिन्न १७ बुदामा सम्झौता हुने उल्लेख छ ।

सामान्य व्यवस्थापन, व्यवस्थापन, मार्केेटिङ, प्रचार–प्रसार गतिविधि, स्पोर्ट्स फेसिलिटिज, अध्ययन र अनुसन्धान, प्राविधिक कोचिङ, रेफ्री, फुटबल व्यवस्थापन र टेक्निकल डाइरेक्सन, खेल विकास र प्रतिभाशाली खेलाडी उत्पादन, महिला फुटबल, युथ फुटबल, फुटसल, फुटबल अन्तरगत स्पोर्ट्स साइन्स, स्पोर्ट्स मेडिसिन अन्तरगत फुटबल अनुसन्धान, फुटबल सम्बन्धी अनुसन्धान रर फुटबलका नियम र विधिका विषयमा सहकार्य हुनेछ ।

एन्फा अध्यक्ष शेर्पा र लिग कमिटिका सयोजक विज्ञान राज शर्मा हाल दोहामा रहेका छन् ।

यस्तै सम्झौता कार्यक्रममा दुई राष्ट्रबीच मैत्रीपुर्ण खेल हुने उल्लेख छ । सम्झौतापछि एन्फाका अध्यक्ष कर्मा छिरिङ शेर्पाले कतार फुटबलसँगको सहकार्य नेपाली फुटबललको लागि राम्रो रहेको बताएका छन् ।

एन्फा अध्यक्ष शेर्पा र पल्सर सहिद स्मारक ‘ए’ डिभिजन लिगका संयोजक विज्ञानराज शर्मा अक्टोवर २२ मा कतार प्रस्थान गरेका थिए । एन्फाले यसअघि पनि जापान फुटबल फेडेरेसन (जेएफए) सँग सम्झौता गरेको थियो ।