चितवन, फागुन २६ चितवनको पटिहानीमा सम्पन्न पद्मोदय अन्तर्राष्ट्रिय पुरुष भलिबल प्रतियोगिताको उपाधि भारतको बीएमडब्लु क्लबले जितेको छ । प्रतिस्पर्धात्मक बनेको खेलमा विभागीय टिम नेपाल पुलिस क्लबलाई ३–१ ले पराजित गर्दै बीएमडब्लुले उपाधि जितेको हो ।

उपाधिसँगै बीएमडब्लुले १ लाख ५० हजार रुपैयाँ नगद पुरस्कार जितेको छ । उपविजेता नेपाल पुलिस क्लबले १ लाख रुपैयामा चित्त बुझायो् ।
बीएमडब्लुले पहिलो सेट २५–२२ ले आफ्नो पक्षमा पा¥यो । दोस्रो सेटमा खेलमा फर्कदै पुलिसले २५–१७ को जित निकाल्यो । तर, तेस्रो र चौथो सेटका खेलमा आपसी तालमेल मिलाउन नसक्दा पुलिसले दोस्रो स्थानमा चित्त बुझाउन बाध्य बन्यो । बीएमडब्लुले तेस्रो र चौथो सेट २५–१६ र २५–२१ ले जित्यो ।
यस्तै सशस्त्र प्रहरीको एपिएफ क्लबले प्रतियोगितामा तेस्रो स्थान हात पारेको छ । बुधबारै भएको खेलमा बंगलादेशको वाटर डेभलेपमेन्ट बोर्ड (डब्लुडीबी) लाई ३–१ को सेटमा पराजित गर्दै एपीएफले तेस्रो स्थान प्राप्त गरेको हो । लगातार दुई सेट जितेको एपीएफले तेस्रो सेट गुमाएपनि चौथो सेटमा पुनः उत्कृष्ट पुनःआगमन गर्दै जित हात पारेको हो । एपीएफले २५–११, २५–१६, १८–२५ र २५–१९ को सेटमा जित हात पारेको हो । तेस्रो भएको एपिएफले ५० हजार रुपैयाँ पुरस्कार प्राप्त ग¥यो ।
महाशिवरात्रिको अवसरमा आयोजित प्रतियोगितामा ६ टिमले सहभागिता जनाएका थिए ।