काठमाडौं (हाम्रो खेलकुद) – नेपालका प्रिन्स दाहाल ब्याडमिन्टन एसिया यु–१५ एन्ड यु–१७ जुनियर च्याम्पियनसिपको प्रि–क्वाटरफाइनलमा पराजित भएका छन् ।

म्यानमारको मन्डलाटार थिरी स्टेडियममा आज बिहान भएको प्रि–क्वाटरफाइनलमा प्रिन्स भारतका एस शंकर मोटुस्वामी शुक्र मनियमसँग २–१ को सेटमा पराजित भएका हुन् । प्रतिस्पर्धात्मक खेलको पहिलो सेट १५–२१ ले गुमाएपनि उत्कृष्ट पुनरागमन गरेको प्रिन्सले दोस्रो सेट २१–१४ ले सहजै आफ्नो पक्षमा पारेको थियो । निर्णायक सेटमा आफ्नै गल्तीमा पछि परेको प्रिन्सले शंकरलाई कडा टक्कर दिएपनि १९–२१ ले खेल गुमाउन पुगेको थियो ।

खेल ४७ मिनेट चलेको थियो । दुवई इन्टरनेसनल जुनियर च्याम्पियनसिपको च्याम्पियन प्रिन्सले राउन्ड अफ ३२ मा सिंगापुरका खलोडीलाई पराजित गरेको थियो ।
यु–१५ मिक्स डबल्स्मा प्रिन्स दाहाल र रसिला महर्जनको जोडी क्वाटरफाइनलमा थाइल्यान्डका खेलाडीसँग निरा बने ।

यु–१७ महिला डबल्स्मा रसिला र रन्जनाको जोडी क्वाटरफाइनलमा प्रवेश गरेकी छन् । उनीहरुले आजै सेमिफाइनल प्रवेशका लागि प्रतिस्पर्धा गर्नेछ ।

ब्याडमिन्टन एसिया यु–१५ एन्ड यु–१७ जुनियर च्याम्पियनसिपमा एसियाका पावरहाउसहरु थाइल्यान्ड, भियननामा, जापान, मलेसिया, सिंगापुर, हङकङ, दक्षिण कोरिया, श्रीलंका इन्डोनेसिया लगायतका देशहरुको सहभागिता रहेको छ ।

यसै प्रतियोगिताको लागि नेपालबाट दुई पुरुष, दुई महिला खेलाडी र एक व्यवस्थापक म्यानमार पुगेको थियो । खेलाडीमा प्रिन्स दाहाल पेम्वा शेर्पा, रसिला महर्जन र र।न्जना भट्ट रहेका छन् । टिम व्यवस्थापकको रुपमा जीवन सिंह कुँवर रहेका छन् । प्रिन्सको म्यानेजरको रुपमा आफ्नै मामा कमलेस निरौला आफ्नै खर्चमा प्रिन्ससँगै रहेका छन् ।

प्रिन्स दुवईबाट च्याम्पियन भएर फर्केकै दिन टोली म्यानमार प्रस्थान गरेको थियो ।