काठमाडौं (हाम्रो खेलकुद) – नेपाली राष्ट्रिय भलिबल टिमका महत्वपूर्ण सदस्य मान बहादुर श्रेष्ठ हङकङमा भएको १०औं पुरुष भलिबल प्रतियोगितामा सर्वाेत्कृष्ट खेलाडी घोषित भएका छन् ।

आयोजक घान्द्रुक समाज युकेबाट खेलेका उनी प्रतियोगिताको मोस्ट भ्यालुएवल खेलाडी चुनिएका हुन् । उनी सेमिफाइनलमा म्यान अफ दि म्याच समेत बनेका थिए । फाइनलमा घान्द्रुक समाज युके र पर्वत समाज हङकङबीच आइतबार राति भएको प्रतिस्पर्धात्मक फाइनल खेलमा दुवै टोली संयुक्त रुपमा विजेता बने ।

चुनमुन बटरफ्लाईस्थित भलिबल प्ले ग्राउन्डमा भएको प्रतिस्पर्धात्मक फाइनल खेल २–२ को बराबरीमा पुगेपछि खराव लाइटका कारण खेल हुन नसकेपछि आयोजकले दुवैलाई संयुक्त विजेता घोषणा गरेका थिए । घान्द्रुकले २५–१३ र २५–१५ खेल आफ्नो पक्षमा पार्दा पर्वत समाजले २५–२३ र ३४–३२ को प्रतिस्पर्धात्मक जित निकालेको थियो ।

मानबहादुर गतवर्ष पनि यही भलिबल प्रतियोगितामा मोस्ट भ्यालुएवल खेलाडी घोषित भएको थियो । घान्द्रुक समाज हङकङको आयोजनामा भएको प्रतियोगितामा ८ टिमको सहभागिता रहेको थियो ।

विभागीय टोली त्रिभुवन आर्मी क्लबका कप्तान तथा ओपन स्पाइकर रहेका मानले आफुलाई यसरी बोलाएर खल खेलाएकोमा धन्यवाद व्यक्त गर्दै घान्द्रुक समाजको यो गुनलाई कहिल्यै बिर्सन नसक्ने बताएका छन् ।

मान बहादुर गत शुक्रबार प्रतियोगिताको लागि हङकङ प्रस्थान गरेका थिए ।