काठमाडौं (हाम्रो खेलकुद) – आदीअवादी महिला भलिबल (एभीएल) लिगको सम्पूर्ण तयारी पूरा भएको आयोजकले जानकारी गराएको छ । आयोजक नेपाल भलिबल संघ र आदीअवादी फाउन्डेसनले शुक्रबार राजधानीमा पत्रकार सम्मेलनको आयोजना गर्दै प्रतियोगिताको सम्पूर्ण तयारी पूरा भएको जानकारी गराएको हो । 

प्रतियोगिताको उद्घाटन खेलमा अमेरिकी खेलाडी सम्मिलित चितवन टाइगर्स र विभागीय त्रिभुवन आर्मी क्लबबीच खेल हुने आयोजकले जनाएको छ ।
अन्तर्राष्ट्रिय रेफ्रि गौतम लासिवा, अन्तर्राष्ट्रिय रेफ्री क्यानिडेड चन्द्रबदना राई, एशियन अन्तर्राष्ट्रिय रेफ्रि क्यानिडेड पूर्ण चौलागाई, विजय केसी र विकास गुरुङले प्राबीधिक पक्षका बारेमा सहभागि टिमका कोच तथा कप्तानलाई जानकारी गराएका छन् ।

लिगकम नकाउटका आधारमा संचालन हुने प्रतियोगितामा सहभागि टिमलाई दुई समूहमा बिभाजन गरिएको छ । न्यु डायमण्ड,चितवन टाईगर्स र आर्मी एक समूहमा छन् । एपीएफ, पुलिस र पोखरा पिङ्केज अर्को समूहमा रहेका छन् ।

भलिबलको इतिहासमा सर्वाधिक पुरस्कार राखीको एभिएल बिजेताले ६ लाख नगद प्राप्त गर्नेछ । त्यस्तै दोश्रो स्थान हाँसिल गर्नेले ३ लाख र तेश्रोले १ लाख ५० हजार प्राप्त गर्ने छन् । प्रतियोगिताको उत्कृष्ट खेलाडीले एक थान स्कुटर र नगद ५० हजार प्राप्त गर्ने छन् । त्यस्तै टिम तयारीका लागि एपीएफ, पुलिस,आर्मी र न्यु डायमण्डले जनहि १ लाख २५ हजार तयारी खर्च प्राप्त गर्ने छन् ।

प्रतियोगिता १७ असोजसम्म सञ्चालन हुनेछ ।