काठमाडौं (हाम्रो खेलकुद) – ढोरपाटन क्लबको आयोजनामा बुधबारदेखि ओप्स टु ‘ए’ साइड पुरुष तथा महिला भलिबल प्रतियोगिता हुने भएको छ । आयोजक ढोरपटन क्लबले मंगबार राजधानीमा पत्रकार सम्मेलनको आयोजना गर्दै प्रतियोगिताको सम्पूर्ण तयारी पूरा भएको जानकारी गराएको छ ।

प्रतियोगिता गोङ्गबु नयाँ बसपार्कस्थित ढारपाटन क्लबको खेल मैदानमा १० असोजबाट १३ असोजसम्म हुनेछ । नकआउटका आधारमा हुने प्रतियोगितामा पुरुषतर्फ ३२ टोलीको सहभागिता रहेको क्लबका अध्यक्ष मनवीर छन्त्यालले जानकारी गराए । प्रतियोगितामा अन्तर्राष्ट्रिय प्रतियोगिता खेलेका राष्ट्रिय खेलाडीहरुले जोडी बनाएर खेल्न पाउने छैनन् । महिलातर्फ बुधबारमात्रै सहभगी टोलीको टुङ्गो लाग्ने क्लबले जनाएको छ ।

यस्तै मंगलबारै क्लबले मुख्य प्रायोजक अर्गानाइजेसन अफ प्राइभेट स्कुल (ओप्स) सँग सम्झौता हस्ताक्षर गरेको छ । सम्झौतामा क्लबका अध्यक्ष मनवीर छन्त्याल र ओप्सका अध्यक्ष लोकेन्द्र बहादुर खड्काले हस्ताक्षर गरे । सम्झौता अनुसार ओप्सले प्रतियोगितालाई १ लाख २० हजार उपलब्ध गराउनेछ । सम्झौतापछि ओप्सका अध्यक्ष लोकेन्द्र खड्काले ओप्स अध्ययनसँग अतिरिक्त क्रियाकलाप विशेषगरी खेलकुदमा सक्रिय रहेको बताए ।

प्रतियोगिताको पुरुषतर्फको विजेताले ४० हजार रुपैया प्राप्त गर्नेछ । दोस्रो हुनेले २० हजार तथा तेस्रो हुनेले ५ हजार प्राप्त गर्ने आयोजकले जनाएको छ । महिलातर्फको विजेताले २० हजार, उपविजेताले १० हजार र तेस्रो हुनेले ५ हजार पाउनेछ । टिकट काटेर खेल हेर्न आउने एक उत्कृष्ट दर्शकले एक थान युएम मोटरसाइकल प्राप्त गर्नेछ । प्रतियोगिता सञ्चालनका लागि करिव २ लाख ५० हजार खर्च हुने आयोजकले अनुमान गरेको छ ।