ललितपुर (हाम्रो खेलकुद) – जुम्ल्याहा दिदी बहिनी मायांका राणा र माहिका राणा ललितपुरमा जारी वर्सेटेनर ललितपुर जिल्ला राष्ट्रिय खुला टेनिस प्रतियोगिताअन्तर्गत महिला सिंगल्सको सेमिफाइनल प्रवेश गरेकी छन् ।

सातदोबाटोस्थित टेनिस कोर्टमा आइतबार भएको क्वाटरफाइनल खेलमा मायांकाले एश्लेशा लिसानेभिचलाई ६–२, ६–२ ले पराजित गर्दै अन्तिम चारमा स्थान पक्का गरे । बहिनी माहिकाले एनी माथेमालाई ७–६ र ६–१ ले पराजित गर्दै सेमिफाइनलमा पुग्न सफल भए । यस्तै प्रेरणा कोइरालाले प्रकृति श्रेष्ठलाई ६–०, ६–१ ले तथा अभिलाषा भने आइरा रावत (रिटायर्ड हर्ट) भएपछि अन्तिम चारमा पुगिन् । तर, खेलमा अभिलाषाले ७–६, ४–२ ले अग्रता लिएकी थिइन् ।

पुरुष सिंगल्सतर्फ निक रासट्रपले प्रणब खनाललाई २–१ को सेटमा पराजित गरे । निशान श्रेष्ठले सुब्रत बस्नेतलाई ७–६, ७–५ ले, प्रदीप खड्काले इभानहोइ लिसानेभीचलाई ६–२, ६–३ ले, कमल भण्डारीले भिष्मजंग गुरुङलाई ६–१, ६–० ले, महेश श्रेष्ठले नीम वान राईलाई ६–०, ६–० ले र सन्तोष खत्रीले बिजय महर्जनलाई ६–०, ६–१ ले हराएका थिए । नबीन मगरविरुद्ध इन्द्रबहादुर शाहले र जितेन्द्र परियारविरुद्ध मुक्तिसेन गुरुंगले वाकओभर दिएका थिए ।