काठमाडौं (हाम्रो खेलकुद) – विभागीय नेपाल एपीएफ क्लबका धावक गोपीचन्द्र पार्कीले संविधान दिवसको अवसरमा आयोजना भएको हाफ म्याराथनको उपाधि जितेको छ ।

त्रिपुरेश्वरस्थित राष्ट्रिय खेलकुद परिषदबाट मंगलबार बिहान भएको हाफ म्याराथनमा गोपीले निर्धारित २१ किलोमिटर दुरी १ घन्टा १० मिनेट ५४ सेकेन्डमा पुरा गर्दै उपाधि जितेको हो । त्रिभुवन आर्मी क्लबमा होमलाल श्रेष्ठ दोस्रो र आर्मीकै हरि कुमार रिमाल तेस्रो भए । होमलालले १ घन्टा ११ मिनेट ५ सेकेन्डमा दुरी पूरा गर्दा हरिले १ घन्टा १२ मिनेट २५ सेकेन्डमा दुरी पूरा गर्दै तेस्रो स्थान हात पारे । आर्मीका खगेन्द्र भाट १ घन्टा १२ मिनेट ४५ सेकेन्डका साथ चौथो हुदा एपीएफका किरण सिंह बोगटी र खिम बहादुर खत्रीले क्रमश पाँचौ र छैटौं स्थान हात पारे ।

उपाधि विजेता बनेको गोपीले ५० हजार रुपैया प्राप्त गरे । दोस्रो भएको होमलालले ३० हजार तथा तेस्रो स्थान हात पारेको हरिले २० हजार रुपैया प्राप्त गरे । चौथो हुनेले १० हजार प्राप्त गर्दा पाँचौ र छैटौ भएकाले समान ५ हजार प्राप्त गरे ।

विजयी खेलाडीहरुलाई राष्ट्रिय खेलकुद परिषदका सदस्य– सचिव केशवकुमार विष्ट र युवा तथा खेलकुद मन्त्रालयका सचिव मोहन प्रकाश सापकोटाले पुरस्कृत गरे । त्यसअघि हाफ म्याराथनको उद्घाटन युवा तथा खेलकुद मन्त्री जगत सुनारले गरेका थिए । हाफ म्याराथनमा करिव १ सय धावकहरुकले सहभागिता जनाएका थिए ।