काठमाडौं (हाम्रो खेलकुद) – तेस्रो संस्करणको योनेक्स सनराइज जेष्ट राष्ट्रिय खुल्ला ब्याडमिन्टन प्रतियोगिता बुधबारदेखि शुरु हुने भएको छ । आयोजक जेष्ट ब्याडमिन्टन एकेडेमीले सोमबार पत्रकार सम्मेलनको आयोजना गर्दै तेस्रो संस्करणको प्रतियोगिता असोज ३ गतेदेखि ७ गतेसम्म हुने जानकारी गराउनदै प्रतियोगिताको सम्पूर्ण तयारी पूरा भएको जनाएको छ ।

प्रतियोगितामा यसपटक ९ विधा समावेश गरिएको छ । यसपटक पुरुष युगल खुल्लालाई प्रतियोगितामा समावेश गरिएको नेपाल राष्ट्रिय ब्याडमिन्टन टिमका मुख्य प्रशिक्षक तथा प्रतियोगिता संयोजक सुदिप योन्जनले जानकारी गराए ।

यसपटक पुरुष एकल खुल्ला, पुरुष डबल्स (टप २० बाहेक), महिला एकल खुल्ला, यु–१५ पुरुष खुल्ला र यु–१५ महिला एकल खुल्ला, मिक्स डबल्स खुल्ला, मास्टर ३५ वर्षमाथि खुल्ला, मास्टर ४५ वर्षमाथि खुल्ला र पुरुष डबल्स खुल्लामा प्रतिस्पर्धा हुनेछ । सबै विधामा ४३ टिमबाट यसपटक ३०५ खेलाडीले सहभागिता जनाउने आयोजकले जनाएको छ ।

प्रतियोगिताको पुरुष सिंगल्र्सतर्फको विजेताले ३० हजार, उपविजेताले १५ हजार र सेमिफाइनलमा पराजित हुनेले समान ५–५ हजार प्राप्त गर्नेछन् । पुरुष डबल्स खुल्लातर्फको विजेताले २५ हजार, उपविजेताले १२ हजार र सेमिफाइनलमा पुग्नेले ८ हजार पाउनेछ ।

पुरुष डबल्स (टप २० बाहेक)को विजेताले २५ हजार, उपविजेताले १५ हजार र सेमिफाइनलमा पुग्नेले १० हजार पाउनेछ । महिला एकलतर्फको विजेताले २५ हजार, उपविजेताले १२ हजार र सेमिफाइनलमा पराजित हुनेले ४–४ हजार प्राप्त गर्नेछ ।

यु–१५ ब्वाइज र महिलाको विजेताले समान १६ हजार पाउनेछ । ब्वाइजतर्फ दोस्रो हुनेले ६ हजार तथा महिलाले ८ हजार पाउनेछ । तेस्रो हुनेले समान ६ हजार पाउनेछ ।

मिक्स डबल्र्सका विजेताले २० हजार, उपविजेताले १२ हजार र सेमिफाइनलमा पराजित हुनेले ६ हजार प्राप्त गर्नेछ । मास्टर ३५ र ४५ माथिको विजेताले समान २० हजार प्राप्त गर्नेछ । दोस्रो हुनेले १२ हजार तथा तेस्रो हुनेले समान ८ हजार प्राप्त गर्नेछ ।

यसअघिको दुवै संस्करणको पुरुष एकलतर्फ त्रिभुवन आर्मी क्लबका रत्नजित तामाङ र महिला एकलमा आर्मीकै नङ्सलदेवी तामाङ च्याम्पियन बनेको थियो ।

प्रतियोगिताको सबै खेल जेष्ट ब्याडमिन्टन एकेडेमी बसुन्धारमा हुनेछ ।