प्रकाश तिमल्सिना

ढाका – साफ च्याम्पियनसिप (साफ सुजुकी कप) का लागि २० सदस्यीय नेपाली टोली यति बेला ढाकामा रहेको छ । अहिलो टोलीमा रहेका मध्ये ३ खेलाडीले यो साफ च्याम्पियनसिप अघि नै ५० क्याप जितिसकेका थिए । नेपाली टोलीका फरवार्ड भरत खवासले पनि पनि यहि साफ मार्फत ५० क्याप पुरा गरेका छन् ।

बंगलादेशविरुद्ध समूह चरणको अन्तिम खेलमा कप्तानी समेत गरेका भरतको राष्ट्रिय टोलीका लागि त्यो ५० औं खेल थियो । सन् २००८ मा पाकिस्तानविरुद्धको मैत्रीपूर्ण खेलमा डेब्यू गरेका भरतले चोटका कारण पटक पटक राष्ट्रिय टोलीबाट अलग हुनु परेको थियो ।

उनीसँगै डेब्यू गरेका विराज महर्जनले यहि च्याम्पियनसिपका दौरान नेपालका लागि सर्वाधिक क्याप (६९ खेल) जित्ने खेलाडी बनेका थिए । समूह चरणमा भुटानविरुद्ध गोल समेत गरेका भरतको १० अन्तर्राष्ट्रिय गोल पुगेको थियो । उनले नेपालका लागि अबको लक्ष्य सर्वाधिक गोल गर्ने सपना देखेका छन् । पूर्व कप्तान हरि खड्का र नीराजन रायामाझीको नामा समान १३ गोलको कीर्तिमान छ ।

भरतले ५० गोल पुरा गर्नुलाई भाग्यसँग जोडेका छन् । ‘आफुलाई भाग्यशाली ठानेको छु । यहि च्याम्प्यिनसिपका दौरान ५० खेल पुरा भएको छ’, उनले भने, ‘अब साफ च्याम्पियन बनेर फर्कने इच्छा छ ।’ अहिले टोलीमा रहेका विराज महर्जन, गोलकिपर किरण चम्जोङ र रोहितले पनि ५० क्याप जितिसकेका छन् ।

बंगलादेशको खेलसम्मको हाल नेपाली टोलीमा रहेका खेलाडीको क्याप

खेलाडी                        क्याप
विराज महर्जन               ६९

किरण चेम्जोङ             ५४

रोहित चन्द                   ५३

भरत खवास                 ५०

निराजन खड्का           ३१

बिमल घर्तीमगर           २९

अन्जन विष्ट                  २५

सुजल श्रेष्ठ                    २२

नवयुग श्रेष्ठ                   २०

आदित्य चौधरी            २०

अनन्त तामाङ             १९

दिनेश राजवंशी            ३

सुमन अर्याल                ३

सुनिल बल                   ४

विशाल राई               १४

हेमन गुरुङ               १२

देवेन्द्र तामाङ              ३

हेमन्त थापामगर          १

विकेश कुथु                ६

एलन न्यौपाने              डेब्यू गर्न बाँकी