एजेन्सी – विश्व फुटबलमा चर्चित खेलाडी लुईस फिगो, राउल, बेबेटो, गर्रिन्चा, जर्ज बेस्ट, एरिक केन्टोना, डेभिड ब्याकम र ब्र्यान रोब्सन लगायत खेलाडीमा एकै समानता छ । फुटबलमा ७ नम्बरमा जर्सी लगाउने फुटबलहरुको सुचिमा यी नाम जोडिएका छन् । इतिहासलाई हेर्ने हो भने फुटबलमा जर्सी नम्बर ७ राइट विंगरले लगाउने चलन थियो । तर समयको परिवर्तनसंगै यो चलन समेत बदलिंदै आएको छ ।

भर्खरै मात्र रियल छाडेर जुभेन्ट्स गएका रोनाल्डोको जर्सी नम्बर ७ रियलले मरियानो लाई दिएको छ। तर रियलका धेरै समर्थक यो निर्णयबार सन्तुष्ट छैनन् । यी हुन् क्लब फुटबलमा ७ नम्बर जर्सी लगाउने ५ उत्कृस्ट खेलाडीहरु :

५) एन्गोलो कान्टे (चेल्सी) :

चेल्सीका डिफेन्सिभ मिडफिल्डर कान्टे नम्बर ७ जर्सी लगाउने उत्कृष्ट खेलाडी मध्येका एक हुन । सन् २०१५/१६ को सिजनमा लेस्टर सिटिले प्रिमियर लिग जित्दा कान्टे त्यस टोलीका महत्वपूर्ण सदस्य थिए । उनी लेस्टरमा जर्सी नम्बर १४ लगाउने गर्थे । तर चेल्सीमा आएसंगै उनले आफ्नो जर्सी नम्बर समेत ७ मा परिवर्तन गरे । कान्टेले फ्रान्सबाट जर्सी नम्बर ७ प्रयोग नगरेपनि उनले त्यहाँ प्राप्त नगरेको केहि सफलता छैन । सन् २०१८ मा विश्वकप जित्दा फ्रान्सका महत्वपूर्ण खेलाडी कान्टे चेल्सीका लागि प्रिमियर लिगमा समेत उति नै सफल रहेका छन् ।

४) फिलिप कोउटिन्हो (बार्सिलोना) :

यहिबर्षको जनवरीमा बार्सिलोना आएका कोउटिन्होलाई सुरुवातमा जर्सी नम्बर १४ दिइएको थियो । तर अार्डा टुरानले क्लब छाडेपछि कोउटिन्होले ७ नम्बर लिएका हुन् । बार्सिलोनामा यसअघि लुईस फिगो, डेभिड भिल्ला, पेड्रोले ७ नम्बर जर्सी लगाएका छन् । ब्राजिलियन कोउटिन्हो यी सबै खेलाडीभन्दा फरक रहेका छन् र आफुले खेलेका २२ खेलमा १० गोल गरिसकेका छन् । यो सिजनसमेत बार्साले उनीबाट धेरै अपेक्षा राखेको छ । बार्सिलोनाका समर्थकहरु समेत मेस्सी र कोउटिन्होको जोडी देखेर खुशी छन् । यस सिजन इनिएस्टाको अभाव महसुस हुन नदिन कौटिन्होको भूमिका अहम रहने छ ।

३) किलियन एम्बाप्पे (पिएसजी) :

एम्बाप्पे विश्व फुटबलका पछिल्लो समयका धेरै चलेका युवा खेलाडी हुन् । यो सिजन पेरिस सेन्ट जर्मनले उनलाई ७ नम्बर जर्सी समेत दिएको छ। टोटनह्याममा जानु अघि लुकास मौराले यो जर्सी नम्बर प्रयोग गरेपनि हाल यो नम्बरको जर्सी एम्बाप्पेलाई दिइएको छ । विश्वकप फुटबल २०१८ मा उत्कृष्ट प्रदर्शन गरेका एम्बाप्पे आफ्नो शातिर दिमाग र गतिका लागि चिनिने गर्छन् । गत सिजन ४४ खेल खेल्दै एम्बाप्पेले पिएसजीका लागि २१ गोल गरेका थिए। रुसमा सम्पन्न विश्वकप फुटबलमा उनी उत्कृष्ट युवा खेलाडी समेत घोषित भएका थिए ।

२) एन्टोइन ग्रिजमेन (एटलेटिको म्याड्रिड) :

सन् २०१४/१५ को सिजनमा एटलेटिको म्याड्रिड आएका ग्रिजमेन त्यसयता सम्मानित जर्सी नम्बर ७ प्रयोग गर्दै आएका छन् । आफ्नो देश फ्रान्सका लागि खेल्दा ७ वा ११ नम्बर जर्सी लगाउने ग्रिजमेन गत वर्षदेखि लगातार ७ नम्बर जर्सीमा देखिएका छन् । बायाँ खुट्टामा धेरै कला भएका फुटबलरका रुपमा ग्रिजमेनलाई लिने गरिन्छ । पछिल्लो सिजन ग्रिजमेनले ४९ खेल खेल्दै म्याड्रिडका लागि २९ गोल गरेका थिए । म्याड्रिड आएपछिका हरेक सिजन ग्रिज्मेनले २५ भन्दा धेरै गोल गरेका छन् । यसै कारणले पनि उनलाई ७ नम्बर जर्सी लगाउने उत्कृष्ट खेलाडीहरु मध्ये एक मानिन्छ ।

१) क्रिस्टियानो रोनाल्डो (युभेन्ट्स) :

सायदै ७ नम्बर लगाउने हालसम्मकै उत्कृष्ट खेलाडी हुन् क्रिस्टियानो रोनाल्डो । केहि समाचारहरु अनुसार उनि स्पोर्टिङबाट युनाइटेड आएपछि पनि उनको पुरानो क्लबकै जर्सी नम्बर (२८) प्रयोग गर्न चाहन्थे । तर डेभिड बेक्ह्यामले क्लब छाडेपछि खाली रहेको जर्सी नम्बर ७ उनलाई दिइएको थियो । युनाइटेडबाट रियल पुगेपछि रोनाल्डोले आफ्नो जर्सी नम्बर समेत ७ नै कायम राखे। रोनाल्डो अघि रियलमा ७ नम्बरको जर्सी राउलले लगाउने गर्दथिए । एक सिजन रोनाल्डोले ९ नम्बर लगाए । रियल छाडेर अहिले युभेन्ट्स पुगेका रोनाल्डोले त्यहाँ समेत ७ नम्बर जर्सी नै प्रयोग गरिरहेका छन् ।