न्यु योर्क (एजेन्सी) –विश्व नम्बर एक स्पेनिस राफेल नाडाल युएस ओपन टेनिसको प्रि–क्वाटरफाइनलमा प्रवेश गरेका छन् । डिफेन्डिङ च्याम्पियन नाडालले रुसी खेलाडी करेन खचानोभमाथि ३–१ को संघर्षपूर्ण जित निकाल्दै प्रि–क्वाटरफाइनलमा प्रवेश गरेको हो । 

न्युयोर्कस्थित अर्थर असे टेनिस कोर्टमा शनिबार बिहान भएको खेलमा ३२ वर्षीय नाडाल पहिलो सेटमा ५–७ ले पछि परेको थियो । १७ पटकको ग्रान्डस्लाम च्याम्पियन नाडालले त्यसपछिको तीन सेटमा संघर्षपूर्ण जित निकाल्यो । दोस्रो सेटमा ७–५ को जित निकालेको नाडालले तेस्रो र चौथो सेट क्रमश ७–६ र ७–६ को जित निकाल्न सफल भयो । खचानोभमाथि जित निकाल्न नाडालले अब अन्तिम १६ मा जर्जियाका निकोलोज बासिलासभिलीसँग प्रतिस्पर्धा गर्नेछन् ।

शनिबार बिहानै सम्पन्न महिलातर्फको खेलमा सेरेना विलियम्सले दिदी भेनस विलियम्सलाई पराजित गर्दै अन्तिम १६ मा स्थान बनाएकी छन् ।
न्युयोर्कमा भएको खेलमा सेरेनाले दिदी भेनसमाथि ६–१ र ६–२ को सोझो सेटमा जित निकालेकी हुन् । सेरेनाले अब प्रि–क्वाटरफाइनलमा इस्टोनियाकी काया कानेपीसँग खेल्नेछिन् ।