काठमाडौं (हाम्रो खेलकुद) – जुम्लाका धिरज बुढा र प्युठानकी भुमि बुढामगरले दोस्रो संस्करणको पाँचपोखरी हाफ म्याराथनको उपाधि जितेका छन् ।

पर्यटकीय नगरी सिन्धुपाल्चोकमा भएको हाफ म्याराथनको पुरुषतर्फ जुम्लाका धिरज बुढाले निर्धारित २४ किलोमिटर दुरी दूरी २ घण्टा ९ मिनेट ५३ सेकेन्डमा पूरा गर्दै उपाधि जितेका हुन् । ओखलढुङगाका सुवास कार्कीले २ घण्टा २४ मिनेट २१ सेकेन्डमा दौड पूरा गर्दै दोस्रो र सोलुका सुमन कुलुङ राईले २ घण्टा २५ मिनेट ४ सेकेन्डमा दौड पूरा गरि तेस्रो स्थान हात पारे ।

महिलातर्फ पहिलो भएकी प्युठानकी भूमि बुढा मगर निर्धारित २४ किलोमिटर दुरी ३ घण्टा ७ मिनेट ५८ सेकेन्डमा दौड पुरा गरिन् । सिन्धुपाल्चोककी प्रिया तामाङले ३ घण्टा १३ मिनेट २६ सेकेन्ड दौड पुरा गर्दै दोस्रो हुन सफल भइन् । धादिङकी रसिला तामाङले ३ घण्टा १३ मिनेट ४६ सेकेन्डमा दौड पुरा गर्दै तेस्रो स्थान हात पारिन् ।

पुरुष र महिला दुबैतर्फको विजेताले जनही ५० हजार रुपैया प्राप्त गरे । महिला पुरुषको दुवै तर्फको दोस्रो र तेस्रो भएकाले समान ३० हजार र २० हजार प्राप्त गरे ।

आयोजकले सिन्धुपाल्चोकतर्फ छुट्दै मूल्यांकन गरी पुरस्कृत गरिएको थियो । जसअनुसार पुरुषतर्फबाट जुगल गाउँपालिकाका मानबहादुुर तामाङ पहिलो, भोताङका फुर्बासिसह तामाङ दोस्रो र भोताङकै जितबहादुर तामाङ तेस्रो भए । महिला तर्फ थकनीकी प्रिया तामाङ पहिलो, भोताङकी ल्हाबुटि लामा दोस्रो र भोताकी खेन्डो लामा तेस्रो हुन सफल भए । पहिलो, दोस्रो र तेस्रो हुनेलाइ क्रमशः १० हजार ७ हजार र ५ हजार प्रदान गरिएको छ ।

विजयी खेलाडीलाई पूर्व कानुनमन्त्री शेरबहादुर तामाङले पुरस्कृत गरेका थिए ।

हाफ म्याराथनमा ४ विदेशिसहित १०९ जना खेलाडीको सहभागिता रहेको थियो । हाफ म्याराथन गत भदौ १० गते भएको थियो ।