काठमाडौं (हाम्रो खेलकुद) – पाँचौ संस्करणको गोदावारी रनिङ दुई सातापछि हुने भएको छ । आयोजक बेसक्याम्प आउटडोर लाइफस्टाइलले आइतबार राजधानीमा पत्रकार सम्मेलनको आयोजना गर्दै पाँचौ संस्करणको गोदावारी रनिङ फेस्टिबल भदौ २घ गते शनिबार गोदावारीमा हुने जानकारी गराएको हो ।

रनिङ फेस्टिबलमा विभिन्न पाँच विधामा प्रतिस्पर्धा हुने इभेन्ट निर्देशक परेश श्रेष्ठले जानकारी गराए । उनका अनुसार दि नर्थ फेस ५ किलोमिटर यति रन, दि नर्थ फेस ५० किलोमिटर अल्ट्रा दौड, सुनोटो ३० किलोमिटर ट्रेल रेस, ला स्पोर्टिभा १५ किलोमिटर ट्रेल रेस र दि नर्थ फेस २ किलोमिटर किड्स यति रन हुनेछ । प्रतियोगितामा ३ सयको हारहारीमा सहभागिता रहने आयोजकले दावी गरेको छ ।

५० किलोमिटर अल्ट्रा रेस गोदावारीबाट शुरु भएर विशंखुनारायण, कोर्ट डाडा, फुल्चोकी हुदै गोदावारी आएर टुंगिने इभेन्ट म्यानेजर राजेश लामाले जानकारी दिए । रेसलाई व्यवस्थित गर्न नेपाली सेनाको भोलुन्टर राखिने आयोजकले जनाएको छ ।

प्रतियोगिताको विजेताले गिफ्ट ह्याम्पर प्राप्त गर्नेछ । एक दिने प्रतियोगिताको लागि करिव १० लाख खर्च हुने आयोजकले अनुमान गरेको छ । प्रतियोगितालाई पाङ्ग्रोले व्यवस्थापन गरेको छ ।दि नर्थ फेस र रेडबुलले मुख्य प्रायोजन छ । सुन्टो र ला स्पोर्टिभाले सह–प्रायोजन गरेको छ ।