म्याड्रिड (एजेन्सी) – क्रिस्टियानो रोनाल्डोको युभेन्ट्स प्रस्थान र जिनेदिन जिदानले पद त्यागेपछि रियल म्याड्रिडले आफ्नो टोलीलाई अझ सशक्त बनाउन नयाँ खेलाडी भित्र्याउनु अत्यावश्यक रहेको थियो । यसका लागि क्लबको खातामा अझैपनि ३०० मिलियन युरो बाँकी रहेको पनि बुझिएको छ । तैपनि रियलले कुनै खेलाडीसँग सम्झौता नगर्नुले समर्थहरु अन्यौलमा छन् ।

धेरैको आँकलन रियलले आफ्नो खाताको ३०० मिलियन युरो ब्राजिलियन स्टार नेयमारलाई जोगाएको बुझाइ रहेको छ । युईएफएले केहिदिनमा पीएसजीको ट्रान्सफर बारे गर्ने निर्णयले नेयमारको रियल ट्रान्सफरलाई अझ नजिक ल्याउन सक्छ । पेरिस सेन्ट जर्मनका केहि फाइल युइएफएले अध्ययन गरिरहेकाले समेत नयाँ ट्रान्सफरमा समय लागेको हो ।

“मार्सा” नामक अनलाइन पत्रिकाले गरेको अध्यन अनुसार युइएफएका कर्मचारीले फ्रेन्च क्लबको अडीट रिपोर्ट अध्यन गरिरहेका छन् र क्लबले प्रायोजनबाट पाएको रकमको अनुसन्धान गरिरहेका छन् । कतार बैंकले तिरेको रकमको विषयमा समेत कर्मचारीहरुले अध्ययन गरिरहेकाछन् र क्लबले पाएको धेरै रकम सोहि बैंकबाट आएको आशंका गरिएको छ । युइएफए कमिटिको निर्णय भने अगष्टको अन्तिम सम्ममा आउनेछ ।

पेरिस सेन्ट जर्मन र बार्सिलोनाले गत सिजनको तुलनामा तलबमा ८० % बढी वृद्धि गरेका थिए । उनीहरुले २०१७/१८ को सिजनमा खातामा कारोबार बराबर गर्नु पर्नेछ । पेरिस सेन्ट जर्मनले भने क्लबको सबै आर्थिक स्थिति सहि रहेको बताउँदै आएको छ । त्यससँगै पेरिस सेन्ट जर्मनले खेपिरहेको अर्को समस्या भनेको नेयमारको लगातार परिवर्तन हुने व्यवहार समेत हो । अर्को एक वर्षसम्म पेरिस सेन्ट जर्मनमा रहने उनको भनाइले उनीमाथि लागेका सबै बोली हटेका हुन् ।

यस्तो अवस्थामा पनि रियल म्याड्रिडले भने नेयमार बाहेक अन्य खेलाडीलाई भित्र्याउने प्रयास नै गरेको छैन । एटलेटिको विरुद्धको हारले अवस्था अझ जटिल बनेको छ । रोबर्ट लेवान्डोस्की, टिमो वेर्नेर, रोड्रीगो लगायतका खेलाडी समेत रियलले दिएको रकममा क्लबमा आउने निश्चित छैन ।