पोखरा(हाम्रो खेलकुद)- सशस्त्र प्रहरी बल कालिका गणको ‘ए’ र ‘बी’ टिम पोखरामा जारी अन्तरक्लब खुला पुरुष बिच भलिबल प्रतियोगिताको सेमिफाइनलमा प्रवेश गरेका छन् । फेवाताल किनारा (बाराहीघाट) मा शनिबार भएको खेलमा एपएिफ ‘ए’ ले मोदी गाउँपालिकालाई २१–१६ र २१–१८ को सोझो सेटमा हराउँदै सेमिफाइनलमा स्थान बनाएको हो ।

एपीएफ ‘बी’ ले कास्की जिल्ला भलिबल संघ ‘डी’लाई २१–११ र २१–१३ सोझो सेटमा हराएर अन्तिम चारमा स्थान बनायो । शनिबारै भएको अर्काे क्वार्टरफाइनलमा पश्चिमाञ्चल भलिबल संघले भलिबल ट्रेनिङ सेन्टर नदीपुरलाई २१–१५, १५–२१ र १५–८ ले हराउँदै अन्तिम चारमा पुग्न सफल भयो । कास्की जिल्ला भलिबल संघ ‘ए’ ले कास्की जिल्ला भलिबल संघकै ‘बी’ लाई १३–२१, २१–१५ र १५–१३ ले हराउँदै अन्तिम चारमा स्थान बनाए ।

सेमिफाइनलमा सशस्त्र प्रहरी कालिका गण ‘बी’ र पश्चिमाञ्चल भलिबल संघबीच सेमीफाइनल हुनेछ । अर्को सेमिफाइनलमा एपीएफ ‘ए’ र कास्की जिल्ला भलिबल संघ प्रतिस्पर्धा गर्नेछन् । फाइनल पनि आइतबारै हुनेछ । कास्की जिल्ला भलिबल संघले शुक्रबारदेखि सुरु गरेको सो प्रतियोगितामा आर्मी र सशस्त्रको ४ विभागीयसहित २२ टिमको सहभागिता रहेको छ । विजेताले ३० हजार र उपविजेताले २० हजारसहित शिल्ड, मेडल र प्रमाणपत्र पुरस्कार पाउनेछन् ।