म्याड्रिड (एजेन्सी) – धेरै हदसम्म ला-लिगा फुटबल बार्सिलोना र रियल म्याड्रिडको प्रतिस्पर्धाका रुपमा लिने गरिन्छ। तर केहि बर्ष यता एटलेटिको म्याड्रिड समेत उपाधि होडमा जोडिएको छ ।

सन् २०१३/१४ को सिजनमा एटलेटिको म्याड्रिडले ला-लिगा उपाधि हात पारेको थियो । त्यसयता भने लिगलाई बार्सिलोना र रियल म्याड्रिडले आफ्नो बनाएका छन् । तर यस वर्षभने केहि त्यस्ता कारण छन् जसले गर्दा ३ वटा टोली नै लिग उपाधिको होडमा रहने छन् । रियल म्याड्रिडलाई जिनेदिन जिदानेले छाडेपछि टोलीमा नयाँ स्वरूप बिकास भएको छ । रियलले आफ्ना सफल स्ट्राइकर क्रिस्टियानो रोनाल्डोलाई समेत टोलीबाट हटाएको छ । उता बार्सिलोनाले भने केहि नयाँ खेलाडीहरु भिडाल, माल्कम, आर्थर जस्ता खेलाडीलाई भित्र्याएको छ ।

यी हुनसक्छन् ५ कारण जसले गर्दा एटलेटिको म्याड्रिडले रियल म्याड्रिड र बार्सिलोनालाई पछाडी छाड्न सक्छ :

१) डिएगो कोस्टाको उत्कृष्ट लय :

चेल्सीमा ३ बर्ष बिताएपछि कोस्टा अन्तिम सिजन म्याड्रिड फर्किएका थिए । तर ट्रान्सफर नियमका कारण उनी जनवरीसम्म उपलब्ध थिएनन् । लिगका सुरुवाती खेल्हारुमा एटलेटिकोलाई कोस्टाको अभाव खड्कीएको थियो । कोस्टा उपलब्ध हुँदासम्म म्याड्रिड लिगको उपाधि दौडबाट बाहिरिनै लागेको थियो भने च्याम्पियन्स लिगको समेत समुह चरणमा नै हार बेहोरिरहेको थियो । कोस्टा एक त्यस्ता प्रतिभा हुन् जसलाई हरेक टोलि चाहान्छ । उनी पूर्ण रुपमा फिट रहेका छन् र रियल बिरुद्ध सुपर कपमा उनको लयसमेत उत्कृस्ट देखिएको थियो ।

२) एन्टोइन् ग्रिजमनको उपस्थिति :

पछिल्ला केहि वर्ष यता ग्रिजमन एटलेटिको म्याड्रिडमा रहन नसक्ने बिषयमा कुरा बाहिरिंदै आएको छ । बार्सिलोनाले फ्रेन्च खेलाडीलाई आफ्नो टोलीमा लिने प्रयास गरेपनि ग्रिजमनले म्याड्रिडमा नै रहने निर्णय लिएका थिए ।

एटलेटिको म्याड्रिडको स्क्वाडमा रहेका सबै खेलाडीहरु मध्ये ग्रिजमन सम्भवतः सबैभन्दा प्रतिभाशाली खेलाडी हुन् । अर्का सहयोगी स्ट्राइकर नहुँदा ग्रिजमेनले अन्तिम सिजन केहि समस्या भोगेका थिए तर यसपटक भने उनको साथमा डिएगो कोस्टा भएकाले पनि म्याड्रिड यी दुईको जोडीबाट धेरै आशा गर्नेछ ।

३) युरोपकै उत्कृस्ट डिफेन्स :

राम्रो डिफेन्स सहितको टोलीभेट्न गाह्रो भएको अवस्थामा एथ्लेटिको म्याड्रिडले भने आफ्नो डिफेन्स कसिलो गरेको छ । म्याड्रिडको डिफेन्सले पछिल्लो ३ सिजनमा मात्र ६७ गोल खाएको छ । गत सिजन खराब प्रदर्शन गरेको रियल बेटिसले एकै सिजन ६१ गोल खाएको थियो ।

डिएगो गोडिन सहितको रक्षापंक्ति मजबुत रहेको छ । म्यानचेस्टर युनाईटेडले यो सिजन गोडिनलाई लिने प्रयास गरेपनि विफल बनेको थियो । स्टेफन साभिच र जोजे जिमेनेजले गोडिनलाई रक्षापंक्तिमा सहयोग गर्नेछन्।

४) डिएगो सिमिओनी रणनीति बनाउन माहिर छन् :

एटलेटिको म्याड्रिडसँग  विश्वकै उत्कृष्ट प्रशिक्षक मध्येका एक डिएगो रहेका छन्। सुपर कपमा रियल म्याड्रिडविरुद्ध प्राप्त जितपछि डिएगो अझ सफल बनेको धेरैको बुझाइ छ । उनको टोलीले बार्सिलोना र रियल म्याड्रिडले जस्तो फुटबल नखेलेपनि डिएगोलाई टोलीलाई जिताउन आउँछ । उनी एक रक्षात्मक म्यानेजर भएपनि उनको टोलीलाई रणनीतिक रुपमा सबल बनाउन माहिर छन् । विश्वका धेरै टोलीले डिएगोलाई आफ्नो टोलीको प्रशिक्षक बनाउन रुचाउनेछन् ।

५) बार्सिलोना र रियल म्याड्रिड पहिलेझैं मजबुत छैनन् :

पछिल्लो ३ सिजन लगातार च्याम्पियन्स लिगको विजेता बनेको रियल म्याड्रिड यस सिजनभने धेरै कम्जोर देखिएको छ। जुलेन लोपेटेगुईको प्रशिक्षणमा यसअघि अन्य टोली समेत धेरै सफल बनेका छैनन् । साथमा स्ट्राइकर क्रिस्टियानो रोनाल्डोको अभाव समेत रियलमा खड्किने छ ।

बार्सिलोनाको हकमा समेत ठूला स्टार खेलाडी टोलीमा रहेपनि उनीहरु पहिले जस्तै मजबुत छैनन् । लियोनल मेसी र लुईस सुआरेज पहिलेको झैं खतरनाक नरहन सक्छन् । टोलीमा नयाँ खेलाडीको आगमन भएपनि उनीहरले कस्तो प्रदर्शन गर्छन भन्ने निश्चित छैन ।